Монголын хүүхдийн спортын зуны VII наадам: Хийн урт бууны төрөлд Э.Хонгорзул спортын мастер цолны болзол хангалаа

Монголын хүүхдийн  спортын  зуны VII наадам энэ сарын 19-нд Баянхонгор аймагт эхэлсэн.  Хоёр жилд нэг удаа зохион байгуулдаг энэхүү наадамд Монгол орны өнцөг булан бүрээс өсвөрийн 5000 гаруй тамирчид спортын 23 төрөлд оролцож байгаа юм. 

Орхон аймгаас 217 тамирчин 37 багш дасгалжуулагчтайгаар спортын 20 төрөлд хурд хүч авхаалж самбаагаа сорьж байна.  “Нөхөрлье, Хөгжье, Хамгаалъя” урион дор 10 хоногийн турш үргэлжлэх наадмын эхний төрлүүдийн шилдгүүд тодорч эхэллээ. 

Vll наадмын буудлагын ганцаарчилсан төрөлд 13 багийн 62 тамирчин хийн гар буу, хийн урт буу, холимог төрлөөр өрсөлдөж байна. Азийн аварга 1, өсвөр үе болон залуучуудын улсын аварга тэргүүтэй спортын спортын мастер, дэд мастер зэрэгтэй 6 тамирчин оролцож байгаа ажээ.  Хийн урт бууны төрлөөр Орхон аймгийн тамирчин Э.Хонгорзул спортын мастер, Сэлэнгэ аймгийн тамирчин Я.Марал, Баянзүрх дүүргийн тамирчин Г.Чинхүслэн нар спортын дэд мастерын болзол биелүүллээ. 

 Тус тэмцээнийг олон улсын шүүгч ,улсын шүүгчээс бүрдсэн нийт 16 шүүгч шүүн явуулж байгаа аж.