Зуны дунд сарын шинийн 3, Балжиннямтай билигт сайн өдөр Баян-Өндөр хайрхнаа тахилаа

Зуны дунд сарын  шинийн 3-ны Балжиннямтай билигт сайн өдөр Баян-Өндөр хайрхнаа тахиж хангай, дэлхий уул усаа аргадан ёслолоо.  Орон нутгийн Хутагт ламын Гандан шаддүвлин хийд,  Гончигсүмлэн хийдүүдийн санаачилгаар  эхэн, дунд саруудад өдрийн сайныг сонгож 2011 оноос хойш тахиж ирсэн билээ. 

Баян-Өндөр хайрхныг орон нутгийн хамгаалалтад авах шийдвэрийг анх 1998 онд тэр үеийн ИТХ-аас гаргаж байв.  Төрийн тахилгат уул, овоог тахихын өмнө “Долоон бурхан” одыг тахиж, тэнгэр, бурхнаа аргаддаг уламжлалынхаа дагуу өчигдөр буюу шинийн 2-ны  22:00 цагт  Баян-Өндөр хайрхныхаа бэлд “Тэнгэрийн долоон бурхан од”-оо тахьсан юм. 

Харин Баян-Өндөр хайрхнаа  энэ өдрийн өглөөний 07:00 цагт тахиж,  лам хуврагууд ном хурахаас гадна 8 тахил, 7 эрдэнийг залж, 4 зүг, 8 зовхист сум харван, аргамаг хүлэг сэтэрлэх зан үйл үйлээ уламжлал ёсоор үйлдлээ.

 Баян-Өндөр хайрхан нь өвөр талдаа Эрдэнэт уул, ард талдаа Хүрэнбургастайн нуруу, баруун, зүүн талдаа Их, Бага залуу, Баянцагаан, Даваатын уулсаар хүрээлүүлсэн хангай юм.