Монголын хүүхдийн спортын зуны VII наадамд Орхон аймгаас 217 өсвөрийн тамирчин оролцож байна

Баянхонгор аймагт Монголын хүүхдийн спортын зуны VII  наадам эхэллээ. Монгол орны өнцөг булан бүрээс  өсвөрийн 5000 гаруй тамирчид  зуны спортын VII наадамд оролцохоор Баянхонгор аймагт иржээ. 

Шигшээ тэмцээний шалгаруулалтад улсын хэмжээнд 43 мянган хүүхэд оролцсоноос ийн шилдгүүд  ирээдүйн тив дэлхийн тамирчид 10 хоногийн турш спортын 23 төрөлд өрсөлдөхөөр хонгор нутагт ирээд байна.

Наадмын нээлт өнөөдөр Баянхонгор аймгийн Цэнгэлдэх хүрээлэнд болж, тамирчдаа үзэгч олонд алдаршууллаа. Хоёр жилд нэг удаа болдог Хүүхдийн спортын зуны наадам нь хөдөө орон нутагт анх удаа болж байгаа нь энэ юм.

Орхон аймаг өнгөрсөн хоёрдугаар сард “Нөхөрлөл-Тэмүүлэл-Амжилт” уриан дор анх удаа орон нутагт  Монголын бүх ард түмний спортын XIV наадам, Монголын хүүхдийн спортын VII наадмын өвлийн төрлүүдийг амжилттай зохион байгуулсан билээ. 

Орхон аймгийн Засаг дарга С.Батжаргал, аймгийн Биеийн тамирын спортын газрын дарга Д.Дэлгэрбаяр нар орон нутгаасаа оролцож буй тамирчдаа дэмжин, амжилт хүсч нээлтийн арга хэмжээнд оролцлоо. 

Мөн Монгол Улсын Ерөнхий сайд Л.Оюун-Эрдэнэ болон бусад албаны хүмүүс, гадна дотнын зочид төлөөлөгч Хүүхдийн спортын зуны VII наадмын нээлтийн үйл ажиллагаанд оролцож өсвөрийн тамирчдад амжилт хүсэв.

Хонгор нутгийнхан Хүүхдийн спортын наадмын бэлгэдлээр нэн ховор мазаалай баавгайгаа тус наадмын мөнхийн бэлгэдэл Галхүүтэй зэрэгцүүлжээ. 

Нүүдэлчдийн амьдралын хэв маягийг нээлтийн арга хэмжээндээ тусгасан нь нээлтийн үйл ажиллагааны онцлог байв. 

Мөн тус аймгийн Тэмүүжин хүүхдийн драмын театрын хүүхэд багачууд Тэмүүжин дуурийг үзэгч олонд толилууллаа.

Ийн Монгол орны өнцөг булан бүрээс ирсэн өсвөрийн 5000 гаруй тамирчид  "Нөхөрлөе, Хөгжье, Хамгаалья" уриан дор  өрсөлдөнө. 

Тэмцээн маргааш уран гимнастик, даам зэрэг төрлүүдээр эхэлнэ.

Мэдээллийн төв