Монгол Улсын Төрийн албаны зөвлөлөөс хийсэн шалгалтад Орхон аймаг “сайн” үнэлгээ авлаа

Төрийн албаны зөвлөлийн даргын тушаалаар, Төрийн албаны зөвлөлийн гишүүн Б.Идэрчулуунаар ахлуулсан ажлын хэсэг гурав хоногийн хугацаанд манай аймагт ажиллаж, өнөөдөр хяналт шалгалтын дүнг танилцууллаа.

     Ажлын хэсэгт Төрийн албаны зөвлөлийн Маргаан хянан шалгах газрын дарга Ч.Бат-Эрдэнэ, Маргаан хянан шалгах газрын ахлах шинжээч Я.Өлзиймөнх, Захиргаа удирдлагын газрын референт Д.Наран-Отгон нар багтсан.

Төрийн албаны Хүний нөөцийн удирдлагын тогтолцоо, цахим систем дэх мэдээллийн бүрдүүлэлт, Төрийн жинхэнэ албан тушаал буюу төрийн захиргааны албан тушаалд төрийн албан хаагчийг сонгон шалгаруулахдаа хууль тогтоомжийн хүрээнд томилсон эсэх зэрэг хэд хэдэн асуудлын хүрээнд хяналт шалгалт хийхээс гадна арга зүйн зөвлөгөөг өгөхийн зэрэгцээ төрийн албан хаагчдад Төрийн албаны хууль тогтоомжийн талаар сургалт, мэдээлэл өгсөн юм.

     Төрийн албаны зөвлөлийн гишүүн, ажлын хэсгийн ахлагч  Б.Идэрчулуун “Хяналт шалгалт хийхээс илүүтэй зөвлөн туслах арга зүйгээр хангах нь бидний ажлын гол зорилго байлаа. Төрийн алба бол онцгой алба. Ялархаж эсвэл ач санаж хийдэггүй. Гагцхүү хуулиа мөрдүүлж зоилго, зорилтоо биелүүлэхийн төлөө ажилладаг” хэмээн онцлон хэлсэн.

Мөн тэрээр, бидний ярьж, хэрэгжүүлэхээр зорьж яваа зарим зүйлс Орхон аймагт хэдийн нутагшсан байна. Бусад аймаг орон нутагт таниулж, сайн туршлага болох зүйлс байна.Мөн цаашид анхаарах сайжруулах ч зүйлс байна гэлээ.

Энэ удаагийн Төрийн албаны  зөвлөлөөс  хийсэн  шалгалтад Орхон аймаг бусад аймгуудтай харьцуулахад “сайн” үнэлгээ авч байна.

Үнэлгээг Төрийн албаны зөвлөлийн хурлаар эцэслэн батлах юм.  

Аймгийн 20 төрийн байгууллагын 300 гаруй төрийн захиргааны албан хаагчдын мэдээллийн бүрдүүлэлтэд хийсэн хяналт шалгалт энэ удаагийн ажлын гол хэсэг нь байв.  

Энэхүү шалгалтад зөрчилтэй гарсан байгууллагуудад хугацаатай үүрэг даалгавар өгөх ажээ.

Мөн Орхон аймаг дахь Төрийн албаны зөвлөлийн салбар зөвлөл Төрийн албаны хуулийн шинэчлэлийн хэрэгжилттэй холбоотой хийж хэрэгжүүлж буй ажлыг сайшаалаа. Ажил сайн байгаа учир алдаа дутагдал, зөрчил харьцангуй бага байгааг Орхон аймагт гурван өдрийн турш ажилласан Монгол Улсын Төрийн албаны зөвлөлийн гишүүд онцолж байна.