“Хамтдаа Эрдэнэтэд хөгжье-2023” эдийн засгийн форум болж байна

Орхон аймаг хоёр жилд нэг удаа эдийн засгийн форум зохион байгуулдаг билээ.  Энэ удаагийн эдийн форумын ач холбогдол нь аймгийн гадаад харилцаа хамтын ажиллагааг өргөжүүлэх, бизнес эрхлэгчдээ дэмжих, хөрөнгө оруулалтыг татах боломжийг нэмэгдүүлэх, “Хамтдаа Эрдэнэтэд хөгжье” хөтөлбөрийн бодлогын баримт бичгээ олон нийтэд танилцуулахад чиглэж байна. 

Мөн  Монгол Улсын “Алсын хараа - 2050” урт хугацааны хөгжлийн бодлого, Шинэ сэргэлтийн бодлого, түүний дотор  “Хөдөөгийн сэргэлт”-ийн хүрээнд хийгдэх хөрөнгө оруулалт, аймгийн нөөц боломж, Орхон аймагт  иргэд ажиллаж амьдрахад эерэг тал нь юу  байх гэхчлэн  мэдээллийг танилцуулах зорилготой. 

    Чуулганы эхний өдөр буюу өнөөдөр “Эрдэнэтэд хамтдаа хөгжих боломж, бизнесийн таатай орчин сэдвээр аймгийн Засаг дарга С.Батжаргал, “Хот хөдөөгийн сэргэлт” сэдвээр Цахим хөгжил, харилцаа холбооны дэд сайд Ж.Эрхэмбаатар нар илтгэл тавилаа. Үргэлжлүүлэн  “Эдийн засгийн хөгжлийн гурвалсан түншлэл” сэдвээр ШУТИС-ын профессор Ч.Баасандаш, “Эрдэнэт үйлдвэр” ТӨҮГ-ын өнгөрсөн одоо ба ирээдүй сэдвээр “Эрдэнэт үйлдвэр” ТӨҮГ-ын Ерөнхий захирал Г.Ёндон нар илтгэл тавих юм. 

Харин “БНСУ-ын Нөү-хау, Барилга бүтээн байгуулалт болон Аж үйлдвэрийг Эрдэнэт хотод нутагшуулах” сэдвээр тус улсын “BK holding” группийн ерөнхийлөгч Пак Пён Чэ, “Хүүхдийн эрх ба бизнесийн зарчмууд” сэдвээр  Монгол дахь НҮБ-ын Хүүхдийн сангийн Суурин төлөөлөгч ноён Эваристе Коуасси Комлан Эва нар зочин илтгэгчээр ороцох юм. 

Харин маргааш  буюу 16,17-ний өдрүүдэд “Смарт Эрдэнэт” экспо болно.  Эдийн засгийн форумд урилгаар Цахим хөгжил, харилцаа холбооны дэд сайд Ж. Эрхэмбаяр, НҮБ-ын Хүүхдийн сангийн суурин төлөөлөгч ноён Эваристе Коуассе Комлан Эва, Польш улсын элчин сайд Кшиштоф Бойко,  Польш улсын  Өргөмжит консул хатагтай Ж.Хулан, БНСУ-ын “ВК холдинг” компаний Ерөнхийлөгч Пак Пён Чэ нар болон бизнес эрхлэгч ААНБ-ууд  оролцож байна. 

Аймгийн Засаг дарга С.Батжаргал чуулганд оролцохоор ирсэн хүндэт зочид, бизнес эрхлэгчид талархал илэрхийлэн, гурав хоногийн турш Орхон аймаг, Эрдэнэт хотод тавтай зочлоорой гэв.

Тэрээр, “Орхон аймаг Эрдэнэт хот нь Монгол Улсын дотоодын нийт бүтээгдэхүүний 6.7 хувь, Хангайн бүсийн дотоодын нийт бүтээгдэхүүний 49.1 хувийг хангаж, улсын төсөвт орлого төвлөрүүлдэг цөөн аймгуудын нэг билээ.   Бид Засгийн газрын үйл ажиллагааны хөтөлбөр, хууль тогтоомжийг орон нутагт амжилттай хэрэгжүүлэн ажиллаж, 2022 оны ажил,  нийгэм эдийн засгийн үзүүлэлтээрээ  Монгол Улсын шилдэг аймгаар шалгарсан амжилтын мэдээг энэхүү индэрээс дуулгахдаа баяртай байна. Энэ бол Орхон аймаг, Эрдэнэт хотын 107 мянга гаруй нийт иргэд, “Эрдэнэт үйлдвэр” ТӨҮГ тэргүүтэй татвар төлөгч 8000 гаруй аж ахуйн нэгж байгууллага,  4000 гаруй төрийн албан хаагчид, эрдэнэтчүүдийн маань хөдөлмөр, зүтгэл сэтгэлийн үр дүн гэдгийг онцлон тэмдэглэе! Эрдэнэтчүүддээ баярлалаа” гэлээ. 

Мөн УИХ-ын гишүүн Д.Батлут,  ИТХ-ын дарга Д.Мөнхбат нар мэндчилгээ дэвшүүлж, чуулганы үйл ажиллагаанд амжилт хүсэв. 

 Энэ жилийн эдийн засгийн форумын онцлог нь 2021 онд цахимаар зохион байгуулсан эдийн засгийн форумаас гарсан үр дүнг бодит ажил хэрэг болгож буйгаараа онцлогтой. 

Тодруулбал, 2021 оны эдийн засгийн чуулга уулзалтаас цахимжуулалтыг эрчимжүүлж, цахим аймаг болох зорилтыг дэвшүүлсэн.  Үүнийхээ хүрээнд ИТХ-ын 2021 оны 20 дугаар тогтоолоор “Цахим Эрдэнэт-1” хөтөлбөрийг  батлуулан хэрэгжүүлж, Эрдэнэт хотын бүхий л үйлчилгээг нэг дор багтаатсан   “Смарт Эрдэнэт”  платформийг Орхон аймгийн иргэдийн хэрэглээнд орон нутгуудаас анхлан нэвтрүүлнэ. 

Түүнчлэн Орхон аймаг, Эрдэнэт хотод хэрэгжих боломжтой 36 төслийг чуулганы үеэр орон нутгийн жижиг, дунд бизнес эрхлэгчдэд болон иргэдэд танилцуулж байна. 

Орон нутгийн бизнес эрхлэгчид, иргэд эдгээр төслүүдтэй  танилцаж, хөрөнгө оруулалт татах, бизнес түнш болох боломжтой. Төслүүдийг багцалбал, барилга, барилгын материал үйлдвэрлэл, хүнсний үйлдвэрлэл, хөнгөн үйлдвэрлэл, биотехнологийн үйлдвэрлэл, технологи хөгжүүлэлт, эрчим хүчний төслүүд байна.