“Хамтдаа Эрдэнэтэд хөгжье-2023” эдийн засгийн чуулганаар орон нутагт хэрэгжих боломжтой 36 төслийг танилцуулна

Аймаг орон нутгийнхаа гадаад харилцаа, хамтын ажиллагааг өргөжүүлэх, орон нутгийн бизнес эрхлэгчдээ дэмжих, хөрөнгө оруулалтыг татах боломжийг нэмэгдүүлэх зорилгоор хоёр жилд нэг удаа зохион байгуулдаг эдийн засгийн форум маргааш Соёл урлагийн цогцолборт 09:00 цагт эхэлнэ. 

Чуулганы эхний өдөр буюу маргааш “Хамтдаа Эрдэнэтэд хөгжье-2023” эдийн засгийн форум болох бол 16,17-ний өдрүүдэд “Смарт Эрдэнэт” экспо болох юм. 

    Энэ жилийн эдийн засгийн форумын онцлог нь 2021 онд цахимаар зохион байгуулсан эдийн засгийн форумаас гарсан үр дүнг бодит ажил хэрэг болгож буйгаараа онцлогтой. 
Тодруулбал, 2021 оны эдийн засгийн чуулга уулзалтаас цахимжуулалтыг эрчимжүүлж, цахим аймаг болох зорилтыг дэвшүүлсэн.  Үүнийхээ хүрээнд ИТХ-ын 2021 оны 20 дугаар тогтоолоор “Цахим Эрдэнэт-1” хөтөлбөрийг  батлуулан хэрэгжүүлж, Эрдэнэт хотын бүхий л үйлчилгээг нэг дор багтаатсан   “Смарт Эрдэнэт”  платформийг Орхон аймгийн иргэдийн хэрэглээнд ийн нэвтрүүлэхэд бэлэн болоод байна. 

“Смарт Эрдэнэт”  аппликейшнийн онцлог нь E-Mongolia  буюу төрийн цахим үйлчилгээний нэгдсэн системийн дэд систем байдлаар орон нутгийн бүхий л үйлчилгээг нэг дор багтаасан цахим платформ юм. 

Гурван өдрийн турш үргэлжлэх энэхүү арга хэмжээний талаар Өнөөдөр аймгийн ЗДТГ-ын Хөгжлийн бодлого төлөвлөлт, хөрөнгө оруулалтын хэлтсийн дарга С.Даваадорж, Эрдэнэт шинжлэх ухаан технелогийн  паркийн захирал Г.Энхбаяр, “Цахим-Эрдэнэт 1” төслийн менежер Б.Дэлгэрмөрөн нар олон нийтэд мэдээлэл өгсөн. 

Эдийн засгийн чуулганы нэг дэх өдөр...
    “Хамтдаа Эрдэнэтэд хөгжье-2023” эдийн засгийн форумд “Эрдэнэтэд хамтдаа хөгжих боломж, бизнесийн таатай орчин сэдвээр аймгийн Засаг дарга С.Батжаргал, “Хот хөдөөгийн сэргэлт” сэдвээр Цахим хөгжил, харилцаа холбооны дэд сайд Ж.Эрхэмбаатар, “Эдийн засгийн хөгжлийн гурвалсан түншлэл” сэдвээр ШУТИС-ын профессор Ч.Баасандаш, “Эрдэнэт үйлдвэр” ТӨҮГ-ын өнгөрсөн одоо ба ирээдүй сэдвээр “Эрдэнэт үйлдвэр” ТӨҮГ-ын Ерөнхий захирал Г.Ёндон нар илтгэл тавина. 

Харин “БНСУ-ын Нөү-хау, Барилга бүтээн байгуулалт болон Аж үйлдвэрийг Эрдэнэт хотод нутагшуулах” сэдвээр тус улсын “BK holding” группийн ерөнхийлөгч Пак Пён Чэ, “Хүүхдийн эрх ба бизнесийн зарчмууд” сэдвээр  Монгол дахь НҮБ-ын Хүүхдийн сангийн Суурин төлөөлөгч ноён Эваристе Коуасси Комлан Эва нар зочин илтгэгчээр ороцоно. 

Түүнчлэн Орхон аймаг, Эрдэнэт хотод хэрэгжих боломжтой 36 төслийг чуулганы үеэр орон нутгийн жижиг, дунд бизнес эрхлэгчдэд болон иргэдэд танилцуулах юм. Дээрх төслүүдийн 30 нь нийслэл Улаанбаатар хотоос, 6 нь БНСУ-ын төсөл байна. 

Орон нутгийн бизнес эрхлэгчид, иргэд эдгээр төслүүдтэй  танилцаж, хөрөнгө оруулалт татах, бизнес түнш болох боломжтой юм. 
Төслүүдийг багцалбал, барилга, барилгын материал үйлдвэрлэл, хүнсний үйлдвэрлэл, хөнгөн үйлдвэрлэл, биотехнологийн үйлдвэрлэл, технологи хөгжүүлэлт, эрчим хүчний төслүүд байна. 

“Хамтдаа Эрдэнэтэд хөгжье-2023” эдийн засгийн форумд БНСУ-ын бизнес эрхлэгчид,   УИХ-ын гишүүд, ОХУ, Польш зэрэг улсаас Монгол Улсад суух Элчин сайдууд, Олон улсын байгууллагын суурин төлөөлөгч нар оролцоно. 

Эдийн засгийн чуулганы хоёр дахь өдөр...
Чуулганы хоёр дахь өдөр буюу 16-нд  дижитал бизнесийн талаар мэдлэг олгох IT чуулган, хэлэлцүүлэг болно. Мөн аймаг орон нутагтаа IT чиглэлээр үйл ажиллагаа явуулдаг байгууллагуудын үнэ төлбөргүй сургалт, ERDENET MLC E-sport-ийн тэмцээн, технологийн компаниудын бүтээгдэхүүн үйлчилгээгээ танилцуулах арга хэмжээ гэсэн  4 хэсгээс бүрдсэн  “Смарт Эрдэнэт Экспо” болно. 

Бизнес эрхлэгчид өөр өөрсдийн ур чадвар дээр бизнэсээ эхлүүлж, хөгжүүлэхдээ хамгийн сүүлийн үеийн цахим технологийг хэрхэн нэвтрүүлж, ашиглах боломжтой вэ гэдэг сонголтыг хийх боломжтой. 

Эдийн засгийн чуулганы гурав дахь өдөр...
"Смарт Эрдэнэт экспо"-ний  гурав дахь өдөр буюу бямба гаригт арга хэмжээнд оролцож буй байгууллагуудаар өртөөчлөн танилцах боломжтой. Мөн facebook AR filter бүтээх сургалт, Дижитал Арт сургалт, лего кодинг, анхны кодчилолын сургалт, электроник кодингийн сургалтууд  нэг өдрийн турш үнэ төлбөргүй болох учраас сонирхсон хүн бүхэнд нээлттэй. Түүнчлэн 8-аас дээш насны хүүхэд бүрийн насны онцлогт тохирсон сургалтууд явагдана. 

Форумыг аймгийн ИТХ, ЗДТГ, Эрдэнэт шинжлэх ухаан технологийн парк хамтран зохион байгуулж байна. Иргэн Та бүхнийг  мэдээллийн технологийн хөгжилтэй холбох “Смарт Эрдэнэт экспо”-д оролцохыг урьж байна.