Хөрөнгө оруулалт:22 мянган сурагч стандартад нийцсэн ширээ, сандалтай хичээлийн шинэ жилээ эхлүүлнэ

Засаг даргын шуурхай зөвлөгөөнөөр аймгийн Боловсрол,шинжлэх ухааны газрын дарга О.Ариунгэрэлт  2023 оны эхний хагас жилийн байдлаар  боловсролын салбарт орон нутгийн хөрөгө оруулалтаар  хийгдэж буй бүтээн байгуулалтын ажил болон  нийлүүлэлт нь  хийгдэж  дууссан ажлын талаарх мэдээллийг танилцууллаа. 

22 мянган сурагч стандартад нийцсэн ширээ, сандалтай хичээлийн шинэ жилээ эхлүүлнэ 

Аймгийн ерөнхий боловсролын 17 сургуулийн 6-10 дугаар ангийн 282 танхимын ширээ сандлыг шинэчлэхэд орон нутгийн төсвөөс 2,2 тэрбум төгрөгийг зарцуулав. “Сухайт хайрхан” ХХК энэхүү ажлыг гүйцэтгэж нийлүүлсэн бөгөөд өнөөдрийн байдлаар сургуулиудад  тараагдаж угсралтын ажлыг гүйцэтгэж байна. 
Тодруулбал, 282 танхимын 5072 ширхэг ширээ, 10144 ширхэг сандлыг шинэчилснээр нийт сурагчдын 92 хувь буюу 22018 сурагч стандартад нийцсэн шинэ ширээ сандалтай боллоо. 

Хүний  биеийн эрхтэн тогтолцоо сургалтын хэрэглэгдэхүүнийг хүлээлгэн өгөв 

Аймгийн ЗДТГ, БШУГ хамтран хэрэгжүүлж буй “Эрүүл хүүхэд” төслийн хүрээнд 15 дугаар сургуульд 13 сая төгрөгийн үзүүлэн таниулах материал, сургалтын хэрэглэгдэхүүнийг “Санаа мед трейд”  ХХК бэлтгэн нийлүүлэв. 

“Тэгш боломж” төслийн танхимын тавилгыг нийлүүлэв 

“Тэгш боломж” төслийн хүрээнд 2, 13, 15 дугаар сургуулиудад багц-2, 29 сая 986 мянган төгрөгийн шаардлагатай тоног төхөөрөмж тавилгыг “Санаа мед трейд”  ХХК  бэлтгэн нийлүүлэв. 

Жаргалант сумын ЕБС-ийн ширээ сандлыг шинэчиллээ 

Жаргалант сумын ерөнхий боловсролын сургуулийн 4 анги танхимд Орон нутгийн  хөгжлийн сангаас 46 сая төгрөгийн 60 ширээ, 60 вандан сандлыг  “Чандмань эргэл”  ХХК нийлүүлэв. 

Боловсролын салбарын их засварын ажлаас...

• 21 дүгээр цэцэрлэгийн гадна фасадны их засварын ажлыг  165 сая төгрөгөөр “Гурван уулын хишиг” ХХК гүйцэтгэсэн. Уг ажил өнгөрсөн сарын 3-нд эхэлж 17-нд бүрэн дууссан. 
• “Унага” цэцэрлэгийн урд, хойд корпусын фасадны дулаалгын ажлыг “Талст билэг” ХХК гүйцэтгэж байна.  171 сая төгрөгийн санхүүжилттэй уг ажлын  гэрээ тавдугаар сарын 12-нд эхэлсэн. 
• “Ирээдүйн одод” сургуулийн спорт заалны өргөтгөлийг “Мээжин савдаг” ХХК гүйцэтгэнэ. Өнгөрсөн сарын 22-ны өдөр гэрээ байгуулан ажлаа эхлүүлсэн. Гадна сангийн холболтын дулаалгын ажлыг өнөөдрийн байдлаар гүйцэтгэж байна. Барилгын суурийн ажлыг эхлүүлэхээр бэлтгэл ажлаа хангаад байна. 
• Чандмань багт баригдаж буй 150 хүүхдийн хүчин чадалтай цэцэрлэгийн барилгын цутгалтын ажил бүрэн хийгдэж дууссан.  Дээвэр болон дүүргэлтийн ажлыг гүйцэтгэж байна. Уг хөрөнгө оруулалтын ажлыг “Хөх тавилан” ХХК гүйцэтгэж буй.