Баяр наадмын урлаг соёлын арга хэмжээнд оролцсон хүүхэд багачууд, уран бүтээлчдэд олгодог урамшууллыг нэмнэ

Монголын тулгар төрийн 2232, Их Монгол улсын 817, Ардын хувьсгалын 102 жил-Үндэсний их баяр, Орхон аймаг, Эрдэнэт хот байгуулагдсаны 47 жилийн баяр наадмыг ирэх сарын 10,11-ний өдрүүдэд тэмдэглэн өнгөрүүлнэ. 

Өнөөдөр аймгийн ИТХ-ын ээлжит бус X хуралдаан хуралдаж хоёр асуудал хэлэлцсэний нэг нь Баяр наадмыг зохион байгуулах хороо, төсвийн задаргааг хэлэлцүүлж батлууллаа. 
Хэлэлцэж буй асуудалтай холбоотой илтгэлийг аймгийн Засаг дарга С.Батжаргал танилцуулсан юм. 

Энэ жилийн баяр наадмыг зохион байгуулах хороон даргаар аймгийн ЗДТГ-ын дарга Ш.Ганболд, нарийн бичгийн даргаар аймгийн ЗДТГ-ын Цэргийн штабын дарга, дэд хурандаа Б.Оюунтүлхүүр болон  холбогдох төрийн  байгууллагуудын төлөөллийг оролцуулсан 29 хүний гишүүнтэйгээр батлав. 

Баяр наадмыг зохион байгуулахтай  холбоотой ажлын төсөв тооцоог ИТХ-ын зөвлөлийн хуралдаанаар хэлэлцсэн.  Ингэхдээ хурлын зөвлөлийн гишүүд  болон аймгийн ИТХ-ын зарим төлөөлөгчид  “олон нийт рүү чиглэсэн соёл урлагийн арга хэмжээг зохион байгуулах, урлаг соёлын арга хэмжээнд оролцож буй  хүүхэд багачууд  болон уран бүтээлчдийн урамшууллыг нэмье” гэсэн санал гаргасны үндсэн дээр баяр наадмыг зохион байгуулах төсөв өнгөрсөн жилийнхээс 100 сая төгрөгөөр нэмэгдсэнийг аймгийн ИТХ-ын дарга Д.Мөнхбат онцолсон. 

Монголын тулгар төрийн 2232, Их Монгол улсын 817, Ардын хувьсгалын 102 жил-Үндэсний их баяр, Орхон аймаг, Эрдэнэт хот байгуулагдсаны 47 жилийн баяр наадмыг зохион байгуулах зардал 419 сая төгрөг байна.  Уг зардлыг  Орхон аймаг, “Эрдэнэт үйлдвэр” ТӨҮГ-ын хамтын ажиллагааны зардал болон орон нутгийн төсвөөс гаргах юм. 

   Тодруулбал, наадмын нээлт, хаалт,  урлаг соёл, спортын арга хэмжээний нийт төсөв 160 сая төгрөг юм. Үүний 47 сая төгрөг нь Орхон аймаг, “Эрдэнэт үйлдвэр” ТӨҮГ-ын хамтын ажиллагааны зардлаас, 113  сая төгрөг нь орон нутгийн төсвөөс зарцуулна. 

Аймгийн ЗДТГ-ын дарга, Баяр наадмыг зохион байгуулах хороон дарга Ш.Ганболд “Баяр наадмын  соёл урлагийн арга хэмжээнд оролцох уран бүтээлчид маань бүтэн сарын хугацаанд бэлтгэлээ хийдэг. Халуун наранд, бороотойд олон түмнээ цэнгүүлэх гэж өдөр шөнөгүй бэлтгэлээ хийдэг.  Өмнөх жилүүдийнхээс өөрчлөлт орж байгаа төсөв нь уран бүтээлчдэд олгох урамшуулал, мөн залуучуудад зориулсан баяр наадмын оройн соёл урлагийн арга хэмжээ   багтсан” гэлээ. 

Тухайлбал, үндэсний бөхийн барилдаанд хамтын ажиллагааны зардлаас 20 сая, орон нутгийн төсвөөс 2,1 сая, хурдан морины зардалд хамтын ажиллагаанаас 40 сая, орон нутгаас 25 сая, баяр наадам явуулах талбайн тохижилтын зардалд хамтын ажиллагаанаас 19,2 сая орон нутгаас 8 сая төгрөгийг тус тус төсөвлөжээ. 

Аймгийн  ЗДТГ-ын Нийгмийн бодлогын хэлтсийн дарга А.Бумансор "Наадмын зохион байгуулалтын үйл ажиллагаанд 680 гаруй уран бүтээлчид, төрийн албан хаагчид оролцоно. Сүүлийн жилүүдэд урамшууллын дүнг тодорхой хэмжээнд өсгөж ирсэн.  Олны хэсэгт оролцож байгаа нэг уран бүтээлчдэд 50 мянган төгрөг олгоно. Сүүлийн 3 жил Төрийн сангаар бэлэн бусаар буюу дансаар гүйлгээ хийж ирсэн. Найруулагч, зураач, хөгжмийн найруулга, бүжиг дэглээч, туслах найруулагч,  хөтлөгч, хөгжим техникч  гэх мэт ажиллах хүчин, уран бүтээлчдийн  зардалд 40 гаруй сая төгрөгийн  цалин урамгуулалд олгоно" гэв.