Эмч нарийн баг өрх бүрээр орж эрүүл мэндийн тусламж, үйлчилгээ үзүүлнэ

Өрхийн эрүүл мэндийн төвүүд дотоод нөөц бололцоонд тулгуурлаж  үзлэг оношилгооны тоног төхөөрөмж авах асуудалд нь чиглэл өгч хяналт тавьж ажиллах нэмэгдүүлэх чиглэлээр онцгой анхаарах үүрэг даалгаврыг өнгөрсөн даваа гаригийн Засаг даргын шуухай зөвлөгөөнөөр  Засаг дарга С.Батжаргал Эрүүл мэндийн газрын дарга Д.Сүхээд үүрэг өгсөн. 

Өнөөдрийн байдлаар аймгийн Өрхийн эрүүл мэндийн төвүүдийн тоног төхөөрөмжийн хангалт 95 хувьтай байгаа гэдэг мэдээллийг ЭМГ-аас өгч байна. 

Тухайлбал, цусны дэлгэрэнгүй шинжилгээний анализатор, биохимийн аппарат, шээсний шинжилгээний аппарат, центрифугээр 100 хувь хангагджээ.  Мөн зүрхний цахилгаан бичлэгийн аппарат 17, дефибриллятор 9, билиметр 9 байна. Сэргээн засах тусламж үйлчилгээний аппаратын хангалт 85 хувьтай байна. 

Засаг дарга С.Батжаргал Өрхийн эмнэлгүүдийн тоног төхөөрөмжийн хангалт сайн байгаа. Харин тэдгээр тоног төхөөрөмжүүдээ ажиллуулахад эмч сувилагч нарыг чадавхжуулахад анхаарахыг үүрэг болгов. Хэрэв өрхийн эмнэлэгүүд байгаа тоног төхөөрөмжөө хангалттай сайн ажилуулж өдөр тутамдаа хэрэглэдэг бол БОЭТ-д хүлээлт үүсэхгүй гэдгийг Засаг дарга С.Батжаргал онцоллоо. 

Мөн өрх бүрийн хаалгыг татаж эрүүл мэндийн тусламж үйлчилгээ, үзлэг оношилгоо үзүүлэх   төслийг ойрын хугацаанд боловсруулж таницуулахыг ЭМГ, БОЭТ-ийн удирдлагуудад үүрэг болгов. 

Эрт илрүүлэг улсын хэмжээнд өрнөсөн нэг жилийн хугацаанд Орхон аймаг 20 гаруй иргэнийхээ хавдрыг нэгдүгээр шатанд нь илрүүлсэн. Урьдчилан сэргийлэх үзлэгээ эрчимжүүлэх үүднээс өрх бүрийн хаалгыг татаж иргэдийг эрүүл мэндийн үзлэг оношилгоо, шинжилгээнд хамруулахыг үүрэг болгоод байгаа юм.