819 өрхөд үер усны аюулын анхааруулга, сэрэмжлүүлэг хуудсыг хүргүүлэв

Өнгөрсөн даваа гаригийн Засаг даргын шуурхай зөвлөгөөнөөр Засаг дарга С.Батжаргал “Хотын үерийн далан сувгийн хэвийн үйл ажиллагааг шалгах холбогдох арга хэмжээг авч ажиллах.  Мөн үерт өртөж болзошгүй иргэд, аж ахуй нэгж байгууллагуудад анхааруулах мэдэгдэх хуудсыг хүргүүлж гарч болзошгүй эрсдэлээс урьдчилан сэргийлэх арга хэмжээ авах” үүрэг даалгаврыг өгсөн. 

Үүнд, Хотын захирагчийн алба...

Гэр хорооллын үерийн даланд тогтмол үзлэг хийж бөглөрөл үүссэн байсан гурван байршлын хогийг Хот тохижуулах газраар цэвэрлүүлэн хэвийн байдлыг хангалаа. 

Онцгой байдлын газраас...
Хотын захирагчийн алба, Онцгой байдлын газар хамтран Баян-Өндөр сумын үерийн усны инженерийн хийцлэлтэй болон байгалийн далан, суваг, шуудуунд ерөнхий үзлэгийг хийж ажилласан.  Орхон аймгийн 29 баг, худалдааны төв, аж ахуйн нэгж, байгууллага, иргэдэд үерийн аюулаас урьдчилан сэргийлэх тухай гамшгаас хамгаалах улсын хяналтын ахлах байцаагчийн 04/04 дугаартай албан мэдэгдэл хүргүүлсэн. Цахим мэдээллийн сайтуудаар үерийн усны аюулаас урьдчилан сэргийлэх сэрэмжлүүлэг, цаг агаарын мэдээ мэдээллийг тогтмол хүргэн ажиллаж байна.

Баян-Өндөр сум... 
Зорилтот бүлгийн иргэдийг түр ажлын байраар ханган үерийн далангийн хогийг Онцгой байдлын газар, Хот тохижуулах газартай хамтран цэвэрлүүлэв. Мөн үеот өртөж болзошгүй байрлалд амьдарч буй гэр хорооллын 16 багийн 819 өрхөд анхааруулах мэдэгдэл хуудсыг хүргүүлж, гарч болзошгүй эрсдлээс урьдчилан сэргийлэх арга хэмжээг авч ажиллаж байна. 

Жаргалант сум...
Үерийн далан сувгийн хогийг цэвэрлэж хэвийн үйл ажиллагааг ханган үерт өртөж болдошгүй 18 иргэн, аж ахуйн нэгж байгууллагуудад анхааруулах мэдэгдэх хуудсыг тараан ажилласан гэсэн биелэлтийг тус тус ирүүлжээ.