Зургадугаар сарын 1-ний өдрийг “Хүүхэд бүхэн аз жаргалтай байг” уриан дор тэмдэглэн өнгөрүүлнэ

Олон улсын хүүхдийн эрхийг хамгаалах өдөр буюу зургадугаар сарын 1-ний арга хэмжээний талаар холбогдох албаныхан өнөөдөр мэдээлэл өглөө.  Энэ жил Орхон аймаг  Олон улсын хүүхдийн эрхийг хамгаалах өдрийг “Хүүхэд бүхэн аз жаргалтай байг” уриан дор тэмдэглэн өнгөрүүлэхээр бэлтгэл ажил хангаж байна. 
Аймгийн ЗДТГ, “Эрдэнэт үйлдвэр” ТӨҮГ, ГБХЗХГ, БШУГ, Цагдаа, Онцгой, Эрүүл мэнд, Хот тохижуулах гэхчлэн бүхий л төрийн байгууллага,  ААНБ хамтран ажиллаж буй. 

Засаг даргын орлогч А.Түвшинжаргал:
 -Зургадугаар сарын 1-нд нээлтийн үйл ажиллагаа 11:00 цагт А.Амарын талбайд эхэлнэ. Энэ өдөр  автомашингүй өдөр байна. Холбооны уулзвараас Баянгийн уулзвар хүртэл авто машины хөдөлгөөнийг 09:00-20:00 цаг хүртэл хязгаарлана. Жолооч нартаа хэлэхэд нэг өдөр хүүхдүүддээ хүндэтгэл үзүүлэн гэрлээ асаан замын хөдөлгөөнд  соёлтой оролцохыг уриалж байна. 

А.Амарын талбайд нээлтийн үйл ажиллагааны соёл урлагийн арга хэмжээнээс гадна урлагийн төрөлжсөн сургалттай “Уран эгшиг” сургуулийн сурагчдын тайлан тоглолт болно. Орон нутгуудаас урлагийн төрөлжсөн сургуультай аймаг манай аймаг. Өнгөрсөн жил үйл ажиллагаагаа явуулж эхэлсэн энэ сургуулийн сурагчид нийт Эрдэнэтчүүддээ өнөөг хүртэл сурч, мэдсэн зүйлсээ хуваалцаж, толилуулахаар бэлтгэж байна.  

Мөн Хүүхдийн хөгжил төслийн хүрээнд аймгийн ерөнхий боловсролын сургуулиудад үкүлэлэ хөгжмийг олгосон. Бүх сургуулийн дэргэд үкүлэлэ хөгжмийн дугуйлан хичээллэж байгаа. Энэ дугуйлангийн сурагчид аав, ээж, үеийн найзууддаа сурсан мэдсэнээ хуваалцахаар бэлтгэж байна” хэмээн соёл урлагийн арга хэмжээний талаарх ерөнхий мэдээллийг өглөө. 

Үйлчилгээний төв, Номын төвийн урд талбайд   засах тайз ААНБ-уудад нээлттэй

А.Амарын талбайд  арга хэмжээний төв тайз, дэлгэцийг засах бол Үйлчилгээний төв, Номын төвийн урд талбайд  нэмэлт тайз засах юм. Тэдгээр тайз, дэлгэц дээр урлаг, соёлын арга хэмжээ болохоос гадна аж ахуйн нэгж байгууллагад нээлттэй байдлаар үйл ажиллагааг зохион байгуулна. 

А.Амарын талбайд хүүхдийн нас биенд тохирсон олон төрлийн арга хэмжээ өрнөнө 

Хүүхдүүдийн нас биенд нь тохирсон олон төрлийн хөгжөөнт тоглоом, уралдаан, тэмцээн А.Амарын талбайд өрнөнө. Тухайлбал, буухиа тэмцээн, унадаг дугуйн уралдаан,хөл бөмбөгийн тэмцээн, бадминтоны тэмцээн,корнхоллын тэмцээн болох юм. 

Мөн  16:00-19:00  Open mic арга хэмжээг ч зохион байгуулах учир хүүхдүүд Та бүхэн сонирхсон төрөлдөө оролцох боломжтой юм. 
10:00-20:00 цаг хүртэл худалдаа үйлчилгээ, хоол үйлдвэрлэл, хүүхдийн тоглоомын үйлчилгээ ч мөн адил байна. Тэдгээрт Баян-Өндөр сум хяналт тавин зохион байгуулалт хийх  бэлтгэлийг хариуцан ажиллаж байна. 

• Хоёр дахь байршил Эрдэнэт цэцэрлэгт  хүрээлэнд 12.00 цагаас  3х3 сагсан бөмбөгийн тэмцээнтэйгээд гадна байгууллага, аж ахуй нэгж байгууллагуудын хүүхдийн баярын арга хэмжээ болно. 
• Гурав дахь байршил Эрдэнэт спорт амралтын хүрээлэн буюу Наадмын талбайд: 12:00 Үндэсний бөхийн тэмцээн болно. 
• Мөн  багуудын Соёлын төвүүд 15:00-18:00 цагийн хооронд хүүхдийн баярын арга хэмжээг зохион байгуулах юм. 

Хүүхдийн Паркийн асуудлаар...

Наадмын талбайн зүүн талд байх хашаалсан газар хувь хүний өмч. Дээр нь байгаа тоглоом хэрэгсэл ч хувь хүний эзэмшил. Тухайн парк Олон улсын хүүхдийн эрхийг хамгаалах өдрөөр үйл ажиллагаагаа явуулж эхлэх эсэхийг  хэлж мэдэхгүй. Хариуцагч эзэмшигчийн асуудал. Хувийн байгууллага нь засвар үйлчилгээ, тохижилтоо хийж эхэлсэн. Мэргэжлийн байгууллага, улсын байцаагчийн дүгнэлт нь ямар нэгэн эрсдэлгүй гэж үзэх юм бол ажиллуулах эрх нь тухайн байгууллагын асуудал. Аймаг орон нутгийн удирдлагууд ажиллуулахгүй, ажиллуулна гэдэг шийдвэрийг гаргахгүй гэх тайлбарыг Засаг даргын орлогч А.Түвшинжаргал өгөв. 
Хэрэв хүүхдийн парк зургадугаар сарын 1-нд нээлтээ хийлээ гэхэд замын хөдөлгөөн, зогсоол, орц гарцын аюулгүй байдлыг хангах цаашлаад хоол үйлдвэрлэл, худалдаа үйлчилгээнд хяналт тавих, зөвлөгөө зөвлөмжөө өгч төрийн байгууллагын зүгээс хийх ёстой ажлаа хийнэ гэлээ.

Парад алхалтын учир ....

Парад алхалтын арга хэмжээг нэгдсэн байдлаар алба ёсоор  зохион байгуулахгүй юм. Тодруулбал, 2022 оны үйл ажиллагаагаа сурталчлах сургууль, дугуйлангийн сурагчид багш нар, аав, ээж, найз нөхөдтэйгөө алхах нь нээлттэй.  Өнгөрсөн жил ийм санал нэлээдгүй гарсан учир энэ жил нээлттэй байхаар төлөвлөсөн. Үйл ажиллагааг зохион байгуулах ажлын хэсгээс 1500 хүүхдийг хувцсаар жигдрүүлж, уриа лоозон бариулж алхуулна гэсэн зүйл байхгүй гэдгийг зохион байгуулах ажлын хэсгээс өгч байна. 

Цагдаа, Эрүүл мэнд, Онцгой, Хот тохижуулах газрынхан эрүүл, аюулгүй байдал, цэвэр орчинд анхаарна 

Зургадугаар сарын 1-нд “Авто машингүй” өдөр байна.  Холбооны уулзвараас Баян худалдааны төвийн уулзвар хүртэлх авто замыг 09:00-20:00 цаг хүртэл хязгаарлана. 
Мөн бусад уулзвар, гарц дээр цагдаагийн алба хаагчид аюулгүй байдлыг хангаж ажиллах юм.  Тиймээс хүүхэд багачуудаа хүндэтгэн нэг өдөр замын хөдөлгөөндөө соёлтой оролцохыг нийт жолооч нараасаа уриаллаа.  Түүнчлэн дээрх зам хаасан хэсэгт хүүхэд унадаг дугуй, рольк, скүүтэрээр тоглоход эрсдэлгүй. Бусад замын хөдөлгөөн эрчимтэй хэсэгт бага насны хүүхдээ тоглуулахгүй байхыг цагдаагийн байгууллагаас сэрэмжлүүллээ. 

Мөн "Эрдэнэт цэцэрлэг"-т хүрээлэн чиглэлийн автозамын ачаалал нэмэгддэг учир тухайн чиглэлд авч хэрэгжүүлэх арга хэмжээг ирэх даваа гаригт танилцуулна гэлээ.