“Хөх Монгол” цогцолборын баруун талд хаалга нэмж гарган дотор, гадна орчныг сэргээн засварлана

Зарим иргэдийн зүгээс “Хөх Монгол” цогцолборын хашааг буулгах саналыг гаргаад буй. Хотын захирагчийн албанаас хашааг буулгаж, зөөх санхүүжилтын тооцоо судалгааг гаргахад 63 сая төгрөг шаардлагатай гэсэн.  Өнгөрсөн мягмар гаригт Засаг дарга С.Батжаргал болон ЗДТГ-ын дарга Ш.Ганболд, Хотын захирагчийн албаны дарга Б.Одгэрэл нарын албаны хүмүүс тус цогцолборын өнөөгийн нөхцөл байдалтай биечлэн танилцсан юм. 

     Энэ үеэр цогцолборын хашааг буулгахгүйгээр  V микр буюу баруун талд нэмэлт хаалга гаргах, одоо байгаа урд, хойд, зүүн талын хаалганы өнгө төрхийг өөрчилж, сэргээн засварлах, хөгжлийн бэрхшээлтэй иргэн зорчих боломжийг хангасан зам, орц, гарц бий болгохоор шийдвэрлэв.  2016 онд ашиглалтад орж, үйл ажиллагаагаа явуулж ирсэн тус соёл, урлагийн байгууламжид  21 аймгийн онцлог байгалийн тогтоцыг харуулсан зүйлс бий. Тэдгээрийн өнгө төрхийг тухайн аймгуудын Нутгийн зөвлөлөөр нь сэргээн засварлуулна. 

Аймгийн Соёл урлагийн газар тус цогцолборт 2021 оны арванхоёрдугаар сараас эхлэн үйл ажиллагаагаа явуулж байна.  Сүүлийн өдрүүдэд нийтийн сүлжээгээр гараад байгаа  “цогцолборын хаалга байнгын цоожтой орж,  гарах боломжгүй байдаг” гэх мэдээллийг Соёл урлагийн  хэлтсийн дарга Б.Бэхбилэг үгүйсгэлээ. Тэрээр,  энэ оны нэгдүгээр сарын 1-нээс 24 цагийн харуул хамгаалалттай болж, өвлийн улиралд 07:00-20:00, зуны улиралд 07:00:24:00 цаг хүртэл ажиллаж байна.  Дулаан өдөр хүүхэд залуус чөлөөтэй орж ирж тоглоод гардаг. Өглөөгүүр ээжүүд хүүхдээ ч салхилуулдаг. Мөн өнгөрсөн жил “Open mic”арга хэмжээг зохион байгуулсан. Энэ жил ч мөн адил энэ арга хэмжээгээ “Хөх Монгол” цогцолборт зохион байгуулна” гэлээ. 

Мөн тэрээр, аймгийн болон бусад аймгаас манай аймагт зочлон ирсэн хүн бүр “Хөх Монгол” цогцолборт зочилж Монголын хамгийн өндөр 12 метр 60 см-тэй  Тэнгэрийн ташуур, Монголын нууц товчооноос сэдэвлэсэн уран зураг, үзмэрийг үзэх боломж хэдийд ч нээлттэй  гэв.