Аймагтаа төдийгүй улсад 2022 оны ажил үйлсээрээ манлайлсан Онцгой байдлын газрыг онцоллоо

Улсын хэмжээнд салбартаа болон орон нутагтаа 2022 оны ажил үйлсээрээ манлайлсан төрийн байгууллагуудыг  онцлон цувралаар хүргэж байна.  Аймгийн Онцгой байдлын газар 2022 онд  салбартаа хийж  хэрэгжүүлсэн ажлаараа улсын  хэмжээнд нэгдүгээр байранд шалгарсан орон нутагтаа ч мөн манлайлав. 
Тодруулбал, Засаг даргын захирамжаар орон нутгийн 25 агентлагын 2022 оны үйл ажиллагаанд хийсэн хяналт шинжилгээний дүнгээр шилдэг таван байгууллагад багтсан. 

Сэлэнгэ, Хөвсгөл, Архангай, Булган, Дархан-Уул, Төв зэрэг 6 аймгийн Онцгой байдлын газрын бүсчилсэн удирдлага манай аймгийн Онцгой байдлын газар  нь   2016 оноос хойш  зургаа дахь жилдээ  аймаг орон нутагтаа ажил үйлсээрээ  манлайлж байна. 

2022 онд Онцгой байдлын газрын хийж хэрэгжүүлсэн ажлын заримаас нь онцлон хүргэе. 

Гамшгаас хамгаалах иж бүрэн сургуулийг орон нутагтаа амжилттай зохион байгуулав 

Монгол Улсын Шадар сайдтай Орхон аймгийн Засаг даргын байгуулсан гэрээний хэрэгжилтийг хангах ажлын хүрээнд Онцгой байдлын ерөнхий газраас манай аймагт Гамшгаас хамгаалах иж бүрэн сургуулийг өнгөрсөн оны аравдугаар сарын 1-8-ны өдрүүдэд “Иргэд, олон нийтийн танхимын сургалт”, “Удирдах бүрэлдэхүүний сургалт”, “Команд штабын сургууль”, Дуурайлган үзүүлэх дадлага сургууль” гэсэн үндсэн дөрвөн  хэсэгтэйгээр зохион байгуулсан. Тус арга хэмжээнээс  100 хувийн үнэлгээг дээд шатны байгууллагаас авсан. 

Сургалтын цамхагаа  барих ажлыг гүйцэтгэв 

Гал түймэр унтраах, аврах 68 дугаар ангийн байрлалд орон нутгийн 118  сая төгрөгийн хөрөнгө оруулалтаар 4 замтай сургалтын цамхаг барих ажлыг хийж гүйцэтгэв. Сургалтын цамхагийн өргөн нь 9х6 метр,  өндөр 13,5 метр, 1-4 давхарт ГТУА 56, 58, 68, 81 дүгээр ангиудын алба хаагчид бэлтгэл сургууль хийх мөн аймгийн гамшгаас хамгаалах алба, мэргэжлийн анги, иргэд олон нийтэд зориулан дотроо амрах байр, багаж зэвсэглэмжийн өрөөний зориулалтаар тохижуулан ажиллагаанд оруулжээ. Сургалтын цамхагийн 100 метрийн гүйлтийн 4 замын 9м өргөнтэй 136м урттай замыг хатуу хучилт хийж бэлэн болгож ажилласан байна. 
Орон нутгийн 215  сая төгрөгийн хөрөнгө оруулалтаар техникийн хүчин чадлаа нэмэгдүүлэв 

Орон нутгийн 215  сая төгрөгийн хөрөнгө оруулалтаар тийрэлтэт завийг авч, техникийн хүчин чадлаа нэмэгдүүлэв. Мөн орон нутгийн 32 сая төгрөгийн хөрөнгө оруулалтаар Бүс, аймаг орон нутгийн  хэмжээнд уснаас эрэн хайх, аврах үйл ажиллагаанд ашиглах зорилгоор 2022 оны 01 дүгээр сард Оросын Холбооны Улсад үйлдвэрлэгдсэн МЗСЛ Бриз-520 загварын мотоциклийг авч, техникийн хүчин чадлыг нэмэгдүүлжээ. 

Дэлхийн аваргын хошой мөнгөн медальтантай болов 

Гэрээт Гал түймэр унтраах, аврах 58 дугаар ангийн захирагч, дэд хурандаа А.Отгонбаяр нь Бүгд найрамдах Казахстан улсын Алмата хотод 2022 оны 05 сарын 21-29-ний өдрүүдэд зохион байгуулсан хэрэглэлтэй хэвтээ шахалтын Дэлхийн аварга шалгаруулах “Пауэрлифтинг”-ийн тэмцээнд амжилттай оролцож,  М1 -120 кг жинд 275 кг шахсан амжилт үзүүлэн 2 дугаар байрт шалгарч, дэлхийн аваргын хошой мөнгөн медальтан болсон.

Гэр хорооллын зургаан багт 150 сая төгрөгийн хөрөнгө оруулалт хийлээ 

2022 онд “Гамшгийн эрсдэлийг олон нийтийн оролцоотой бууруулах” үндэсний хөтөлбөрийг хэрэгжүүлэх зорилгоор орон нутгийн түвшинд гамшгийн менежментийг сайжруулж хот, суурин газрын гамшгийн эрсдэлийг даван туулах чадавхыг бэхжүүлэх зорилготой Дэлхийн Зөн Монгол ОУБ-тай хамтран “Гамшигт тэсвэртэй орон нутаг” төслийг Баян-Өндөр сумын Дэнж, Шанд, Баянцагаан, Их залуу, Булаг, Баянбулаг гэсэн 6 багт хэрэгжүүлэв. 
Төслийн хүрээнд 6 багийн гамшгийн эрсдэлийн ерөнхий үнэлгээг хийж, 6000 гаруй өрхийн эрсдэлийг үнэлж, Шанд багт автомашины гүүрэн гарц, Баянбулаг багт гудамж, өрхийн хаягжилт, бусад 4 багийн зорилтот 178 өрхийн цахилгааны дотор, гадна монтажийг солих, аймгийн хэмжээнд 20 цугларах цэгийн хаягжилт, Аюулгүй галлагаа аяны брошур, сэрэмжлүүлэг тараах материал хэвлүүлэх зэрэг нийтдээ 150 гаруй сая төгрөгийн хөрөнгө оруулалтыг хийлээ. 

Алба хаагчдынхаа ажиллах орчин нөхцлийг сайжруулав

Алба хаагчдынхаа  ажиллах орчин нөхцөлийг сайжруулах чиглэлээр Гал түймэр унтраах, аврах 56, 58, 68, 81, 109 дүгээр ангиуд засвар тохижилтын ажлуудыг хийж гүйцэтгэв. Онцгой байдлын ерөнхий газрын санхүүжилтээр 109 дүгээр салбарынхаа хуучин модон хашааг 550 метр цутгамал бетонон хашаагаар сольж шинэчлэн, хамгаалалтын тор татаж харуул хамгааллтыг сайжруулав.  109 дүгээр салбарын даргын өрөөний иж бүрэн засвар,  харуулын байрыг буулгаж 20 тонны чингэлгээр харуулын ажлын байрыг шинээр тохижуулж, тавцан шат хийж ажилчдын ая тухтай ажиллах орчин нөхцлийг бүрдүүллээ.

2022 онд “АХМАДАД ЭЭЛТЭЙ” байгууллагаар шалгарав

Тус газар нь Ахмад настны тухай хууль, Ахмад настныг тэтгэвэрт бэлтгэх хөтөлбөрийг амжилттай хэрэгжүүлэн, ахмадуудын нийгмийн асуудлыг шийдвэрлэх, мэргэжлийн ур чадварыг нь өвлүүлэх тэдний алдар гавьяаг нь мөнхжүүлэхэд онцгой анхаарч ажилласны үр дүнд 2022 онд “АХМАДАД ЭЭЛТЭЙ” байгууллагаар шалгарлаа. Мөн газрын ахмадын хороо нь Улсын тэргүүний “Ахмадын хороо”-гоор шалгарсан зэрэг амжилт үзүүлээд байна. 

Аймгийн Онцгой байдлын газрын нийт бие бүрэлдэхүүний цаашдын ажилд амжилт хүсье.