Иргэн:Багаасаа лавлагаа, мэдээллээ авдаг болсноор ийш тийш явах явдал, цаг хугацааг хэмнэж байна

Аймгийн Засаг даргын санаачилгаар иргэдэд төрийн үйлчилгээг ойртуулах зорилтын хүрээнд  Баян-Өндөр сумын багуудад Цахим буланг ажиллуулж эхэллээ. “Багийн хөгжлийг дэмжих хөтөлбөр”-ийн хүрээнд энэхүү ажлыг зохион байгуулж, орон нутгийн төсвийн 58 сая төгрөгийн хөрөнгө  оруулалтаар Цахим буланг тохижуулж, техник тоног төхөөрөмжөөр хангав. 
Цахим булангаар иргэд хэрхэн үйлчлүүлж буй талаар Баян-Өндөр сумын Баянцагаан багаас энэхүү мэдээллийг бэлтгэлээ. 

    Баянцагаан багийн байр 2020 онд улсын төсвийн хөрөнгө оруулалтаар ашиглалтад орж, өрхийн эмнэлэг, цагдаа нэг дор  төвлөрөн үйл ажиллагаагаа явуулж  байна.  Зургаан мянган хүн амтай тус багийн ажлын албаар өдөрт дунджаар 40 гаруй хүн төрийн үйлчилгээ авдгаас 7-8 нь цахим үйлчилгээтэй холбоотой асуудлаар ханддаг ажээ. 
Орхон аймаг “Багийн хөгжлийг дэмжих хөтөлбөр”-ийг долоо дахь жилдээ хэрэгжүүлж байгаа билээ. Хөтөлбөрийн хүрээнд Багийн Иргэдийн зөвлөл, ажлын алба, өрхийн эмнэлэг, цагдаагийн хэсгийг нэг дор ажиллах орчин, нөхцлийг бүрдүүлэхийн зэрэгцээ шаардлагатай тоног төхөөрөмжөөр хангасан.
      2021 онд орон нутгийн төсвийн хөрөнгө оруулалтын 47.7 сая төгрөгөөр Баян-Өндөр, Жаргалант сумын 25 багийн зохион байгуулагчдыг суурин компьютероор хангасан бол орон Нутгийн хөгжлийн сангийн 34 сая төгрөгийн хөрөнгө оруулалтаар багуудын Иргэний танхимыг тохижуулж өгсний нэг нь Баянцагаан баг юм.   Энэ удаад тус хөтөлбөрийн хүрээнд орон нутгийн төсвийн 58 сая төгрөгийн хөрөнгө оруулалтаар Баян-Өндөр сумын багуудад  Цахим буланг тохижуулж, техник тоног төхөөрөмжөөр хангалаа. Мөн зарим шаардлагатай хэрэгслийг Баян-Өндөр сумын ЗДТГ-аас шийдвэрлэсэн байна. 

Биднийг очихтой зэрэгцэн тус багийн иргэн иргэний үнэмлэхний лавлагаа авсан юм. Тэрээр, “миний хувьд бие давхар. Хэрэгтэй төрийн үйлчилгээгээ багаасаа авдаг болсонд үнэхээр сэтгэл хангалуун байна. Өмнө нь город руу орж лавлагаа авдаг байсан. Нааш цааш явах унааны мөнгө, очоод дугаарлаж зогсох гэхчлэн асуудал байсан. Одоо гэртээ ойрхон багаасаа авч байгаа нь яалт ч үгүй л төрийн үйлчилгээ иргэдэд ойртсон байна” гэв. 

      Цахим булантай болсноор төрийн үйлчилгээг анхан шатандаа чирэгдэлгүй хурдан шуурхай хүргэх, иргэд төрийн байгууллага, ажил үйлчилгээтэй холбоотой санал, хүсэлт, гомдлоо багийн Цахим булангаар дамжуулан гаргах боломжтой болсон гээд олон талын давуу талыг бий болгож байна.  

Тус багийн хэсгийн ахлагч Д.Нямсүрэн “Баг дээрээ иргэдэд төрийн үйлчилгээг үзүүлэх Цахим булантай болсон нь иргэдийн нааш цааг явах явдлыг багасгахын зэрэгцээ цаг хугацааг нь хэмнэсэн ажил, арга хэмжээ боллоо. Иргэд туйлын сэтгэл хангалуун байна. Ухаалаг утастай ч хүн байна, утасгүй ч хүн байна, өндөр настан хүмүүс ч байна. Хүн болгон цахим орчинд ажиллаад Е-Mонголиагаас лавлагаа, тодорхойлолтоо аваад байж чаддаггүй. Тэгвэл одоо төрийн анхан шатны нэгж өөрийн оршин суугаа газрын багтаа хандахад л бид хүссэн мэдээллийг нь аваад өгөх боломж бүрдлээ. Мөн Багийн ажлын албаараа дамжуулан төрийн байгууллагатай холбоотой санал, хүсэлт, өргөдлөө ч гаргах боломжтой боллоо” хэмээсэн. 

  Багууд дээр ийн Цахим булан ажиллаж эхэлснээр иргэд багаасаа Е-Монголиа лавлагаа мэдээлэл иргэний үнэмлэх, нийгмийн даатгал гэхчлэн лавлагаа, мэдээллийг авах боломжтойгоос гадна  төрийн байгууллага, ажил үйлчилгээтэй холбоотой санал, хүсэлт, гомдлоо Цахим булангаар дамжуулан гаргах боломж бүрдэж байгаа юм. 

Тодруулбал, төрийн аль нэг байгууллагатай холбоотой санал, гомдол, хүсэлтээ бичгээр гаргахад багийн ажлын алба өргөдлийг скайнардан холбогдох байгууллагад нь хуваарилж, шийдвэрлэлтийг эргэн мэдээлэх юм.  Өнөөдрийн байдлаар Найрамдал, Чандмань,Чингэл,Баян-Овоот,Эрдэнэ багт Цахим булан тохижуулах ажлыг хийж байгаа бол бусад 25 багт Цахим булан үйл ажиллагаагаа явуулж эхлээд байна. 

Төрийн анхан шатны нэгж Багуудад цахим үйлчилгээг нэвтрүүлсэн анхны аймаг нь ийн Орхон аймаг, Эрдэнэт хот боллоо.