С.Жаргалсайхан:Амралтын өдрүүдэд төр, ААНБ, иргэдийн оролцоотой 11 байршилд 600 мянга гаруй мод тарилаа

Жил бүрийн тавдугаар сарын эхний долоо хоногийн бямба гаригт “Бүх нийтээр мод тарих” үндэсний өдөр тохиодог. Өнгөрөгч амралтын өдрүүдэд Орхон аймгийн төрийн байгууллага, хувийн хэвшил, иргэдийн  оролцоотойгоор 11 байршилд 600 мянга  гаруй мод тарилаа хэмээн даваа гаригийн Засаг даргын шуурхай зөвлөгөөнөөр аймгийн БОАЖ-ын газрын дарга С.Жаргалсайхан мэдээллээ. 

Тухайлбал, Тарлан толгойд 191, Сархиа уулын энгэрт 2012, Баян-Өндөр уулын бэлд 1000, авто зам дагуу 196, Их хаадын цуваанд 80 ширхэг мод тарьсан байна. 
Мөн “Бүх нийтээр мод тарих үндэсний өдөр”-ийг угтан А.Амарын талбайд 11 аж ахуйн нэгж багууллагын тарьц, суулгацын үзэсгэлэн худалдаа гарсан. Уг үзэсгэлэн худалдаагаар 6,1 сая тарьц, суулгац худалдаалж 55 сая төгрөгийн борлуулалт хийсэн нь иргэн, нөхөрлөл, хоршоодод ихээхэн дэмжлэг боллоо” хэмээн мэдээллээ. 
Энэ жил төр, хувийн хэвшил, иргэдийн оролцоотойгоор  Орхончууд 1200 га талбайд 4,7 сая мод тарина.

Орхон аймаг “Тэр бум мод” үндэсний хөдөлгөөн, “Ногоон Эрдэнэт” хөтөлбөрийн хүрээнд өнгөрсөн жилийн хавар  долоон байршилд мод тарих ажлыг олон нийтийн оролцоотойгоор зохион байгуулж,  тарьсан модны амьдралын хувь 80,3 гэж үнэлэгдсэн.  Энэ хавар тарьсан модны амьдралтын хувийг ирэх намар тоолох юм.