Багш нарын төлөөлөл “Багш” хөтөлбөрийн хүрээнд Япон улсад туршлага судалж байна

Аймгийн ерөнхий боловсролын сургуулийн багш нарын төлөөлөл  “Багш” хөтөлбөрийн хүрээнд Япон улсад туршлага судалж байна. Тодруулбал, БШУГ-ын даргаар ахлуулсан ерөнхий боловсролын 8 сургуулийн 9 багш хүүхэд хүмүүжлийн эерэг арга "Токкацү" арга зүйн богино хугацааны сургалтад энэ сарын 8-14-ний өдрүүдэд хамрагдаж байгаа юм.

Тэд "Сока" их сургуульд багш болохоор бэлтгэгдэж байгаа оюутнуудын хичээл сургалтын үйл ажиллагаатай танилцаж, оюутнуудтай хамтран хоёр улсын боловсролын салбарт тулгамдаж буй асуудал, хөгжлийн талаар харилцан санал бодлоо солилцон хэлэлцүүлэг хийжээ.

10 дахь жилдээ хэрэгжүүлж буй “Багш” хөтөлбөр нь  багш нараа хөгжүүлэн, мэргэшүүлж,  нийгмийн асуудлыг нь шийдвэрлэж  1600 гаруй багшид бодит үр дүнгээ өгөөд байна.

Өнгөрсөн онд ЗДТГ-аас өрнүүлсөн  "Соёлыг түгээе" аяны хүрээнд Япон улсын боловсролын ТОККАЦУ арга зүйг Орхон аймагт нэвтрүүлж, туршсан билээ.  Тухайлбал,аймгийн ЗДТГ-аас Япон улсын багш Ёшихиро Огавад хүсэлт тавьсаны үндсэн дээр тэрээр сайн дураар манай аймгийн бага боловсролын 35 багшид өөрийн улсын боловсролын онцлог ТОККАЦУ арга зүйн талаар 5 удаагийн сургалт явуулсан юм.   ТОККАЦУ гэдэг нь тусгай хөтөлбөр гэсэн утгатай үг юм. Багш тэг ингэ гэж заах биш харин чиглүүлж сурагчдын оролцоонд тулгуурлан харилцан ярилцдаг боловсролын арга зүй.

Аймгийн VI  сургууль дээрээс бэлтгэсэн ТОККАЦУ сургалтын арга зүйн сурвалжилгыг дараах холбоосоор орж унших боломжтой.