Тогтвортой гэр бүлийг бий болгох “Гэр” төслийг хэрэгжүүлнэ

Өнгөрсөн онд аймгийн хэмжээнд  Шүүх болон шүүх дэх эвлэрүүлэн зуучлалд нийт 450 өргөдөл нэхэмжлэлийг хүлээн авч 400 хэргийг шийдвэрлэснээс 316 гэр бүлийг цуцалжээ. 
Үүнийг 2020,2021 онтой харьцуулахад өссөн үзүүлэлт  юм.

 Монгол Улсын хэмжээнд өдөрт 10 гэр бүл гэрлэлтээ цуцлуулж, 40 хос гэрлэлтээ бүртгүүлдэг байна.

Гэрлэлт, цуцлалтын гол шалтгаан нь гэр бүлээс гадуурх харилцаа, хадмуудын оролцоо, гэр бүл тусдаа гараагүй, бие дааж амьдраагүй, эдийн засгийн байдал, ажилгүйдэл, архидалт, гэр бүлээсээ хол ажил, хөдөлмөр эрхлэлт зэрэг шалтгаантай холбоотой. 

     Тиймээс нийгмийн анхдагч нэгж гэр бүлийг тогтвортой байлгах, үнэ цэнийг нэмэгдүүлэх зорилготой “Гэр” төслийг аймгийн ЗДТГ, Орхон аймаг дахь Шүүхийн тамгын газар хамтран хэрэгжүүлэх гэж байна.  Хүний хөгжлийн суурь орчин, нийгмийн анхдагч нэгж   гэр бүлийн асуудлаар судалгаа хийж, гэрлэгчдэд сэтгэл зүйн мэргэжлийн тусламж, үйлчилгээ үзүүлэх замаар гэр бүл цуцлалтын тоог бууруулах нь энэхүү төслийн үндсэн зорилго юм. 

Гэр бүл цуцлуулахаар өргөдөл гаргасан иргэний асуудлыг  Эвлэрүүлэн зуучлах тухай хуулийн 3 дугаар зүйлийн 3.1.-т “Иргэний эрх зүйн маргаан, хөдөлмөрийн эрхийн маргаан болон гэр бүлийн харилцаанаас үүссэн маргаанд эвлэрүүлэн зуучлалыг хэрэглэнэ” гэж заасан байдаг. 

Гэрлэлт цуцлах шүүхийн үйл явцаас өмнө эвлэрүүлэн, зуучлах үйл явц өрнөдөг. Тодруубал, гэрлэгчид нь гэрлэлт цуцлуулах нэхэмжлэл гаргахаасаа өмнө шүүхийн эвлэрүүлэн зуучлагчид өргөдөл гаргаж, эвлэрүүлэн зуучлагч нь эвлэрэх бүх арга хэмжээг авна. Үүний дараа гэрлэгчид эвлэрээгүй бол гэрлэлт цуцлуулах нэхэмжлэлийг шүүхэд гаргаж, гэрлэлтийг маргааныг шүүх шийдвэрлэнэ.

Шүүх шаардлагатай гэж үзвэл хэрэг хянан шийдвэрлэх ажиллагааг гурван сар хүртэл хугацаагаар түдгэлзүүлж, энэ хугацаанд гэрлэгчдийг эвлэрүүлэх бүх талын арга хэмжээ авна. Шүүх гэрлэгчдийг эвлэрүүлэхэд авах бүх талын арга хэмжээг эвлэрүүлэн зуучлагчаар дамжуулан хэрэгжүүлдэг бөгөөд, Гэрлэгчид эвлэрэх боломжгүй бол шүүхийн шийдвэрт заасан хугацаа дуусмагц шүүх гэрлэлтийг цуцална. 

    Гэхдээ зайлшгүй тохиолдолд буюу гэрлэгчдийн хэн нэгний байнгын хүчирхийлэл, дарамтаас болж гэр бүлийн гишүүдийн амь нас, эрүүл мэнд болон хүүхдийн хүмүүжилд ноцтой хохирол учирч болзошгүй, эсхүл учирсан нь тогтоогдсон бол шүүх эвлэрүүлэх арга хэмжээ авахгүйгээр гэрлэлтийг цуцалдаг. 

Төсөлд  Орхон аймаг дахь Сум дундын иргэний хэргийн анхан шатны шүүхийн эвлэрүүлэн зуучлагч, Орхон аймаг дахь Сум дундын иргэний хэргийн анхан шатны шүүхэд өргөдөл, нэхэмжлэл, хүсэлт гаргасан гэр бүлийн маргааны хэргийн оролцогчид болон Орхон аймгийн шүүхүүдийн шүүгч, ажилчид хамрагдана.

Төслийн хүрээнд...

• Гэр бүлийн тогтвортой байдал, нийгмийн хариуцлагыг нэмэгдүүлэхэд иргэд, албан байгууллагуудтай хамтран ажиллах төлөвлөгөө гаргаж, хэрэгжилтийг хангах
• Шүүхэд Гэр бүлийн маргааныг шийдвэрлүүлэхээр нэхэмжлэл, өргөдөл, хүсэлт гаргасан гэрлэгчдэд гэр бүлийн харилцаа, хандлагыг сайжруулах, эвлэрүүлэх уулзалт, ярилцлагыг зохион байгуулах 
• Гэр бүл цуцлалтын шалтгаан нөхцөлийг судалж, Гэр бүлийн боловсролыг олгох нөлөөллийн арга хэмжээг зохион байгуулах
• Хүүхэд, гэр бүлд сэтгэл зүйн зөвлөгөө өгөх
• Гэр бүлийн тогтвортой байдал, үнэ цэнэ, боловсрол олгох, сургалт сурталчилгааг явуулах зэрэг хэд хэдэн үйл ажиллагааг хэрэгжүүлэхээр тусгажээ.