“Гүүд Нэйборс” олон улсын байгууллагатай хамтын ажиллагааны санамж бичиг үзэглэлээ

Өнгөрсөн онд “Гүүд Нэйборс” олон улсын  байгууллагын  төлөөллүүд манай аймагт ажиллаж, орон нутгийн нөхцөл байдалтай танилцсан. Энэ үеэр аймгийн удирдлагуудтай уулзаж, Хүүхэд ивээн тэтгэх хөтөлбөрт суурилсан орон нутгийн хөгжлийг дэмжих төсөл, хөтөлбөрийг хэрэгжүүлэх талаар санал солилцсон юм. 

Өнөөдөр тус байгууллагын салбар Орхон аймагт албан ёсоор үйл ажиллагаагаа явуулахаар нээгдсэн. Үүнтэй холбоотойгоор “Гүүд Нэйборс” олон улсын байгууллагын  Монгол дахь төлөөлөгчийн газрын суурин төлөөлөгч ноён Жу Сүн Хён, Засаг дарга С.Батжаргал нар хамтын ажиллагааны санамж бичгийг үзэглэлээ. 

Тус санамж бичиг нь 2028 он хүртэл хэрэгжих бөгөөд энэ хугацаанд талууд хамтран Хүүхэд ивээн тэтгэх хөтөлбөрт суурилсан орон нутгийн хөгжлийг дэмжих урт хугацааны төсөл, хөтөлбөрүүдийг хамтран хэрэгжүүлэх юм. Ингэхдээ аймгийн Эрдэнэ, Дэнж, Их залуу, Яргуйт багт төслийн үндсэн үйл ажиллагаа хэрэгжих ажээ.  “Гүүд Нэйборс” ОУТББ нь 1991 онд  БНСУ-д байгуулагдсан, дэлхийн 48 оронд төлөөлөгчийн газартай, НҮБ-д зөвлөх эрхтэй, ашгийн бус хөгжлийн төлөө хүмүүнлэгийн  байгууллага юм.