Улсын биологийн XXIII олимпиад Орхон аймагт хоёр дахь өдрөө үргэлжилж байна

“Улсын биологийн олимпиад ирээдүйн биологичдийг бэлтгэх суурь нь болж өгдөг” хэмээн МУ-ын гавьяат багш Ж.Баасанжав Орхон аймагт зохион байгуулж буй Улсын биологийн 33 дугаар олимпиадын нээлтийн үйл ажиллагааны индэр дээрээс онцлон хэллээ.  Тэрээр, боловсролын салбарт 38 жил ажиллахдаа  аймгийн аварга шалгаруулах биологийн олимпиадад 1992-2006 он хүртэл 10 удаа түрүүлсэн бол 1991-2005 оны хооронд Улсын биологийн олимпиадад 2 удаа түрүүлж 4 удаа дэд байр, тусгай байрт орж байсан билээ.

1991 оноос хойш зохион байгуулагдахдаа түүхэндээ хоёр удаа орон нутагт болж байгаа нь хоёул Орхон аймаг, Эрдэнэт хот болж байна. Өчигдөр манай аймагт  эхэлсэн Улсын биологийн олимпиад 9, 12  дугээр ангийн сурагчдын  сорил, туршилтаар өнөөдөр үргэлжилж байна.  Мөн энэ өдөр олимпиадын нээлтийн арга хэмжээ аймгийн Хүүхэд залуучуудын театрт боллоо.

Нээлтийн үйл ажиллагаанд аймгийн ИТХ-ын дарга Д.Мөнхбат, Засаг даргын орлогч, олимпиадыг зохион байгуулах ажлын хэсгийн дарга А.Түвшинжаргал, Биологийн олимпиадын дэд хорооны удирдлагууд, МУИС-ийн Шинжлэх ухааны сургуулийн Биологийн тэнхимын багш нар тэргүүтэй нийслэлийн 9 дүүрэг 21 аймгаас ирсэн 31 багш, 60 сурагч оролцов.

2011 онд Орхон аймагт зохион байгуулсан   улсын биологийн олимпиад 10 гаруй жилийн дараа дахин манай аймагт болж байгаа нь энэ юм.  Биологийн шинжлэх ухаан нь амьд биесийн үүсэл, бүтэц, өсөлт , үйл ажиллагаа, түүхэн хөгжил, дэлхий дээрх амьд биесийн тархалт зэрэг амьдралыг тал бүрээс  нь судлан улмаар  амьд биесийг ангилан ялгаж, тодорхойлон бичиж, тэдгээрийн зүйлийн үүсэл, өөр хоорондоо болон гадаад орчинтой хэрхэн харилцаж буй,  хамааралтай байгааг нь судалдаг.

Нэг үгээр хэлбэл, хүн төрөлхтний оршихын үндсийг судалдаг шинжлэх ухаан гэж нэрлэж болно.

МУИС-ийн Шинжлэх ухааны сургуулийн Биологийн тэнхимын эрхлэгч Л.Ариунцэцэг “Биологийн шинжлэх ухаанаар бүтээсэн мэдлэгийг нийгмийн бүхий л салбарт хэрэглэх хэрэглэгдэхүүн нь болдгоороо бусад шинжлэх ухаанаас ялгаатай” хэмээсэн.

Манай аймагт болж буй олимпиадад амжилттай оролцсон багш, сурагчид Арабын Нэгдсэн Эмират  улсад болох Олон улсын биологийн 34 дүгээр олимпиадад  оролцох эрхийг авах юм.  Орхон аймаг хими, физик, биологийн улсын олимпидад үргэлж амжилттай оролцсоор ирсэн. 2007 онд болсон Улсын Биологийн 17 дугаар олимпиадад Орхон аймгийн 8 дугаар  сургуулийн багш н.Минсэл алт, 2014 онд Индонез улсад болсон Олон Улсын Биологийн олимпиадад “Орхон-Эмпати” сургуулийн сурагч н.Эрдэнэболд хүрэл медаль хүртэж байсан. 

 Мөн 2022 онд болсон Улсын 32 дугаар  олимпиадад Орхон аймгийн 14 дүгээр сургуулийн сурагч н.Баярмаа алтан медаль хүртэж байсан билээ.  Улсын биологийн олимпиадаас  Орхон аймаг  4 алт, 19 мөнгө, 23 хүрэл медалийн эзэд болсон амжилтыг үзүүлсэн арвих их туршлага, түүхтэй юм

Мөн өнөөдөр Бүсийн биологийн багш нарын  сургалт эхэлсэн. Үүний зэрэгцээ  МУИС-ийн ШУС-ийн Биологийн тэнхимийн номын худалдаа, “Бидний номын сан-бидний бүтээл” үзэсгэлэн, туршилт, "Нуугдмал ертөнц" макро гэрэл зургийн үзэсгэлэн, Ургамлын хатаадсын үзэсгэлэн Мод, цэцэг, бут сөөг үзэсгэлэн,  Улсын биологийн олимпиадын зургийн үзэсгэлэн гарч байна.  

Олимпиадыг   БШУЯ, Боловсролын Ерөнхий газар, аймгийн  ЗДТГ,  БШУГ, Улсын биологийн олимпиадын дэд хороо, МУИС зэрэг байгууллагууд  хамтран зохион байгуулж байгаа юм.