Орон нутагт шилжин суурьших иргэд, ААНБ-ыг дэмжих “Хамтдаа Эрдэнэтэд хөгжье” хөтөлбөрийг баталлаа

Орхон аймагт шилжин ирж, суурьшин ажиллаж амьдрах, иргэд, ААН, байгууллагыг угтан авахад шаардагдах бэлтгэлийг хангах зорилгоор “Хамтдаа Эрдэнэтэд хөгжье” хөтөлбөрийг өнөөдөр аймгийн ИТХ-ын  ээлжит 15 дугаар хуралдаанаар баталлаа.

Монгол Улсын Засгийн газраас хэрэгжүүлж буй “Шинэ сэргэлтийн бодлого”-ын “Хот, хөдөөгийн сэргэлт” зорилтыг хэрэгжүүлэх хүрээнд  аймаг орон нутгийн өнөөгийн нөхцөл байдал нөөц боломж, түүх, соёл, зан заншил, уламжлал, оюун санааны үнэт зүйлс, нийгэм, эдийн засаг, техник, технологи, үндэсний үйлдвэрлэлийн ололт амжилтыг үндэслэн тус хөтөлбөрийг боловсруулсан.

 Хөтөлбөрийн зорилго нь аймагт шилжин ирж суурьшин ажиллаж амьдрах, иргэд, ААН, байгууллагыг угтан авахад шаардагдах бэлтгэлийг хангах, аймгийн хөгжлийн тэргүүлэх чиглэлийг тодорхойлж, аймаг орон нутгийн талаарх нэгдсэн ойлголт, мэдээллийн нэгдмэл удирдлага, зохицуулалтыг бий болгож цахимжуулах, төрийн үйлчилгээг ойлгомжтой, шуурхай болгох юм. Мөн Монгол Улсын Засгийн газрын 2022 оны 419 тоот тогтоолын хэрэгжилтийг хангах чиглэлээр тодорхой зорилтуудыг дэвшүүлэн хэрэгжүүлэх замаар аймаг, сум орон нутгаа хөгжүүлэхэд дэмжлэг үзүүлнэ.   

Хөтөлбөрийн тэргүүлэх чиглэлүүд нь...

• Амьдрах таатай орчин бүрдүүлэх, дэд бүтцийг өргөтгөх, төсөл хөтөлбөр хэрэгжүүлэх, уялдаа холбоог хангах, хөрөнгө оруулалт татах,
• Улсын хэмжээнд үйл ажиллагаа явуулж буй аж ахуйн нэгж, байгууллагуудтай хамтын ажиллагааг идэвхжүүлж аймагтаа ажлын байр нэмэгдүүлэх, 
• Боловсрол, эрүүл мэндийн салбарын үйлчилгээний чанар, хүртээмжийг сайжруулах,
• Үндэсний үйлдвэрлэлийг нэмэгдүүлэх, аймгийн брэнд бараа, бүтээгдэхүүн, үйлчилгээг бий болгон сурталчлах; үйлдвэрлэл, аялал жуулчлал гэх мэт бодит хөрөнгө оруулалт оруулах салбараа эрэмбэлэн хөгжүүлэх, иргэдийн тогтмол орлого олох боломжийг эрэлхийлэх,
• Төр хувийн хэвшлийн хамтын ажиллагааг эрчимжүүлж, иргэд, аж ахуйн нэгж, байгууллагуудыг мэдээллээр хангах, тэднийг аймаг орон нутагт шилжин ирж суурьшин амьдрах сэдлийг төрүүлэх, хандлагыг өөрчлөх, амьдрах таатай орчин бүрдүүлэх, мэдээллээр хангах, эдгээрт чиглэсэн үйл ажиллагаа, арга хэмжээнүүдийг зохион байгуулж тогтмолжуулах зэрэг байна.

Нийт 9 бүлэг 15 зүйл, 36 заалт бүхий тус хөтөлбөр нь гурван жилийн хугацаанд хэрэгжинэ.Тухайлбал, Орхон аймаг руу шилжин суурьших иргэд аж ахуйн нэгж, байгууллагуудад мэдээлэл, үйлчилгээ үзүүлэх цахим платформ буюу “Смарт Эрдэнэт” аппликейшнийг ирэх зургадугаар сард хэрэглээнд нэвтрүүлэх, ирэх тавдугаар сард “Эрдэнэт хөгжил-2023” инноваци, хөрөнгө оруулагчдын чуулга, уулзалтыг зохион байгуулах, орон нутагт шилжин тогтвор суурьшилтай ажиллаж амьдрах иргэдийг ипотекийн зээлд хамруулах зэрэг  асуудлыг тусгасан.

Монгол Улс нэг хүнд ногдох газар нутгийн хэмжээгээр дэлхийд нэгт жагсдаг. Гэсэн хэдий ч өнөөдөр нутаг дэвсгэрийн 0.3 хувийг эзлэх нийслэл хотдоо нийт хүн амын 50 хувь нь амьдарч байна.  Тэгвэл Улаанбаатар хотын төвлөрлийг сааруулж, хүн амын харьцааг 60*40 болгох  нь Хот хөдөөгийн сэргэлт  бодлогын зорилт юм. Өөрөөр хэлбэл,  энэ зорилтын хүрээнд нийслэл хотын хүн амыг 40 хувь, орон нутагт 60 хувь байхаар төлөвлөөд байгаа юм. 

   Орхон аймагт 2022  онд  нийслэл, 21 аймгаас 1938 иргэн, 490 өрх шилжин иржээ.  Үүний 635 иргэн, 158 өрх нь Улаанбаатар хотоос шилжин суурьшсан бол Булган аймгаас 535 иргэн, Сэлэнгэ аймгаас 138, Хөвсгөл аймгаас 130, Дархан-Уул аймгаас 77, Завхан аймгаас  77 иргэн шилжин ирсэн байна. 

Тэгвэл энэ оны эхний гурван сард Энэ оны эхний гурван сард манай аймагт 517 хүн шилжин ирж суурьшжээ. Шилжин ирэгсдийн 38.5 хувь нь Улаанбаатар хотоос, 21.5 хувь нь Булган аймгаас, 7.8 хувь нь Сэлэнгэ аймгаас шилжин ирсэн нь дийлэнх хувийг эзэлсэн байна.  Өнгөрсөн оны эхний гурван сард 463 хүн шилжин ирсэнтэй харьцуулахад өссөн үзүүлэлттэй байгаа юм.

Засгийн газраас Орхон аймгийг 2024 оны эхний хагас жил   буюу 15 сарын хугацаанд хүн амаа 20 хувиар нэмэгдүүлэх үүрэг чиглэлийг өгсөн.  Энэхүү зорилтыг хэрэгжүүлэх хөтөлбөр үйл ажиллагааны төлөвлөгөө ийн батлагдлаа.  Орхон аймгийн хүн ам 109 мянга. Шилжилт хөдөлгөөнийг дэмжиж хүн амаа өсгөснөөр 2024  оны жилийн эцэст 130 мянга болж, ойролцоогоор 21 мянган иргэн буюу 5522 өрх шилжиж ирэх тооцооллыг гаргасан билээ