Хотын 2023-2024 оны өвөлжилтийн бэлтгэл ажлын төлөвлөгөөг баталлаа

Хотын 2023-2024 оны дэд бүтцийн чиглэлээр хэрэгжүүлэх өвөлжилтийн бэлтгэл ажлын төлөвлөгөөг Хотын захирагчийн албаны даргын үүргийг түр орлон гүйцэтгэгч Б.Одгэрэл аймгийн ИТХ-ын хуралдаанд танилцууллаа.  Төлөвлөгөөг боловсруулахдаа харьяа байгууллагуудаас ирүүлсэн нийт 126 санал, хотын инженерийн шугам сүлжээний найдвартай ажиллагаа, зам талбайн хэвийн байдлыг хангахад чиглэсэн ажлуудыг түүвэрлэн авч тусгажээ. 

Өвөлжилтийн бэлтгэл ажлын төлөвлөгөөнд нийт 49 нэр төрлийн ажил төлөвлөснөөс 15 нэр төрлийн ажлыг гадаадын зээл, улсын болон орон нутгийн төсвийн 95,4 тэрбум төгрөгийн хөрөнгө оруулалтаар хийж гүйцэтгэнэ. Мөн 20 нэр төрлийн ажлыг тухайн хангагч байгууллагын дотоод зохион байгуулалт хөрөнгөөр гүйцэтгэхээр төлөвлөж нийт 47,1 тэрбум төгрөгийн дүнтэй ажлуудыг хийхээр төлөвлөсөн байна. 

Хөрөнгийн эх үүсвэр шаардлагатай 4 ажилд 1,037 тэрбум төгрөгийн хөрөнгө шаардлагатай байгаа ажээ. Үүнд Шанд багийн 17-р сургуулийн халаалтын зуухыг шинэчлэх, Кувейтын гудамжинд байрлалтай төв цэвэр усны шугамын ажил хийх, Эко хорооллын дулаан хангамжийн шугам сүлжээг хэсэгчлэн солих ажлууд тус тус тусгагдаад байна. 

    Улсын болон орон нутгийн хөрөнгө оруулалтаар Баянцагаан багт дулааны төв шугам сүлжээний өргөтгөл хийх, Цагаанчулуут, Наран багт ус дулаан дамжуулах төв барих, гэр хорооллын болон хотын төвийн 14 байршилд  гэрэлтүүлэг хийх, нам даралтын шугамаар халдаг сургууль цэцэрлэгүүдийн халаалтын шугам сүлжээний бэлэн байдлыг хангаж нүүрс татан авалт хийх зэрэг 49 нэр төрлийн ажлыг төлөвлөжээ.