Олон нийтийн оролцоотой 1200 га талбайд 4.7 сая мод тарина

Монгол Улсын Ерөнхийлөгчийн 2010 оны дөрөвдүгээр сарын 14-ний өдрийн зарлигаар жил бүрийн тав, аравдугаар сарын хоёр дахь долоо хоногийн бямба гарагийг “Бүх нийтээр мод тарих үндэсний өдөр” хэмээн зарласан байдаг. Энэ өдөр бүх нийтээр мод тарьж амьдарч буй орчноо ногооруулах ажлыг төр, хувийн хэвшил, иргэдийн оролцоотой өрнүүлдэг уламжлалтай.   Орхон аймаг “Тэр бум мод” үндэсний хөдөлгөөн, “Ногоон Эрдэнэт” хөтөлбөрийн хүрээнд өнгөрсөн жилийн хавар  долоон байршилд мод тарих ажлыг олон нийтийн оролцоотойгоор зохион байгуулж,  тарьсан модны амьдралын хувь 80,3 гэж үнэлэгджээ. 

    Тарьмал модны усалгаанд зориулсан автомашин нэмэгдүүлэх, авто зам дагуух ойн зурваст гүнийн худаг гаргаж, усны нөөц бүрдүүлэх зэрэгт анхаарч байгаа талаар аймгийн БОАЖ-ын газраас мэдээллээ. 

Энэ жил хаана, хэчнээн мод тарих мэдээллийг аймгийн БОАЖ-ы газрын дарга С.Жаргалсайхан өглөө. 

Энэ жил 1200  га талбайд 4.7 сая мод тарина 

Энэ хаврын бүх нийтээр мод тарих ажлын хүрээнд....

•  Жаргалант сумын Хонгор морьтын амын ойн санд 48 га талбайд 110 мянган ширхэг мод тарина.
• Ойг нөхөн сэргээх төслийг хэрэгжүүлэхээр олон улсын байгууллагатай хамтран ажиллаж байна. Хөшөөтийн даваанаас Гурван замын уулзвар хүртэл авто зам дагуу 476 мянган ширхэг мод тарина. 
• Согоот уулын ойн санд 605 мянган ширхэг мод, 
• Говилын төмөр замын гарамнаас Хангал гол дагуу 40 га-д 3 сая мод, 
• Газар  тариалангийн хөрс хамгаалах, ойн зурвас 18,2 мянган ширхэг модыг “Эрдэнэт үйлдвэр” ТӨҮГ, 
• Хаягдлын далан орчим, цагаан тоосны дэгдэлтийг сааруулах ойн зурвас үргэлжлүүлэн байгуулах ажилд 500 мянган ширхэг модыг мөн Эрдэнэт үйлдвэр ТӨҮГ-тай хамтран хэрэгжүүлнэ. 
• Хот орчимд  ногоон төгөл  бий болгох зорилтын хүрээнд Гурван зам, Тарлан толгой, Сархиа уул орчмын 15 га талбайд 2500 ширхэг мод тарихаар төлөвлөжээ. Ингэснээр 2023 онд  нийтдээ 1200 га талбайд 4.7 сая ширхэг модыг хаврын тариалалтаар төр, хувийн хэвшил иргэдийн оролцоотой тарина. 

Тарьц, суулгацын үзэсгэлэн худалдаа ирэх сарын эхээр А.Амарын талбайд гарна 

Сум, дундын Ойн ангийн дарга Д.Энхбазар: Энэ жилийн бүх нийтээр мод тарих хаврын тариалалтад 27 төрлийн 2397 ширхэг тарьц, суулгацын нөөц аймгийн хэмжээнд байна. 500 мянга орчмыг нь үзэсгэлэн худалдаанд гаргана. Үзэсгэлэн худалдааг ирэх сарын эхээр зохион байгуулж, 10 хоног үргэлжлүүлэх төлөвлөгөөтэй байна. Тарьц, суулгацын нөөц энэ жилийн хаврын тариалалтад хангалттай хүрнэ. 

"Ногоон Эрдэнэт" болзолт уралдаанд идэвхтэй оролцохыг уриалж байна 

БОАЖ-ын газрын мэргэжилтэн: Л.Батсайхан:  Аймгийн ИТХ-ын хуралдаанаар батлуулан хэрэгжүүлж буй “Ногоон Эрдэнэт” хөтөбөрт айл,өрх бүр хашаандаа 5 ширхэг мод тарихаар тусгасан. Энэ ажлыг идэвхжүүлэх зорилгоор Засаг даргын захирамжаар “Ногоон Эрдэнэт” болзолт уралдааныг шалгаруулж, урамшуулах ажлыг өнгөрсөн жилээс эхлүүлсэн. 
Шагналын сан нь 20 сая төгрөг юм. Мөн хашаандаа мод тарьсан иргэдийн борлуулалтыг дэмжих ажлыг Засаг даргын орлогч А.Түвшинжаргалын санаачилгаар зохион байгуулдаг. Энэхүү хоёр арга хэмжээнд иргэдийг идэвхтэй оролцохыг уриалж  байна.