Он дамжин хийгдэх бүтээн байгуулалтын 43 ажил үргэлжилнэ

   Төрийн хэмнэлтийн хууль болон төсвийн нөхцөл байдлаас шалтгаалан шинээр улсын төсвийн хөрөнгө оруулалтын ажил 2023 онд эхлэх боломжгүй байгаа ажээ. Тэгвэл  өмнөх оноос он дамжин хийгдэх бүтээн байгуулалтын 43 ажил байгаа юм. Өнөөдрийн байдлаар 10 ажил эхэлсэн байна. 
     Тухайлбал орон нутгийн төсвийн хөрөнгө оруулалтаар 2021 онд ажил нь эхэлсэн Номын өргөөний барилгын ажил энэ онд дуусна. Гүйцэтгэгчээр орон нутгийн “Шинжүү” ХХК ажиллаж байгаа бөгөөд өнөөдрийн байдлаар ажлын явц 73 хувьтай үргэлжилж байгаа талаар танилцууллаа. 
     Мөн Баян-Өндөр сумын хөрөнгө оруулалтаар Чандмань багт баригдаж буй 150 хүүхдийн цэцэрлэгийн барилгын ажил 25 хувьтай үргэлжилж байна. Өнөөдрийн байдлаар  1-р давхрын хучилтын арматурчлал хийгдэж байгаа юм. Тус барилгын гүйцэтгэгчээр “Хөх тавилан” ХХК ажиллаж байна.