Сонголт, шийдлээр арвин нэг өдрийг Эрдэнэтчүүд төв талбайдаа өнгөрөөж байна

Сонголт, шийдлээр арвин нэг өдрийг Эрдэнэтчүүд  төв талбайдаа өнгөрөөж байна 

Админ  2023-04-22  388 

Байгаль орчинд ээлтэй, эрчим хүчний хэмнэлттэй шийдэл, технологи гэж ярих ч яг ямар шийдэл, технологийг сонгож хэрэглэх талаар иргэдийн ойлголт, мэдээлэл дутмаг. Тэгвэл өнөөдөр А.Амарын талбайд зохион байгуулсан “Ногоон амины орон сууц”-ны нээлттэй өдөрлөгөөр  амины орон сууцтай болоход заавал инженерийн шугам сүлжээтэй газар  байх шаардлагагүй, тэвнийн чинээ нүхээр хэчнээн их дулаан алдаж, тэр хэрээрээ цахилгаан, эрчим хүч зардуулдаг гэхчлэн  бидний мэддэг, мэддэггүй, ойшоодоггүй олон мэдээллийг мэргэжлийн байгууллагууд нэтгэж өгөв. 

     Өдөрлөгт Засаг дарга С.Батжаргал, Засаг даргын орлогч, ажлын хэсгийн ахлагч А.Түвшинжаргал болон аймгийн ИТХ-ын төлөөлөгчид  бусад албаны хүмүүс оролцлоо. 

Дэлхийн нийт хүлэмжийн хийн 40 хувийг барилгын салбар үүсгэдэг бол манай улс дэлхийн хүлэмжийн хийн 0,1 хувийг ялгаруулж, нэг ам.долларын ДНБ-ийг үйлдвэрлэхэд дэлхийн дунджаас долоо дахин их эрчим хүч зарцуулдаг  байна.  Дэлхийн дулаарал, уур амьсгалын өөрчлөлтад хамгийн ихээр нөлөөлж буй барилгын салбар нэн тэргүүн байгальд ээлтэй шийдэл нь “Ногоон барилга” гэж үзэн  энэ чиглэлд анхаарлаа хандуулах болсон. 

Ногоон барилга гэж юу вэ   гэх ойлголт нь  барилгын сууриас эхлээд дуусах хүртэл бүх үйл явцыг  багтаадаг гэдгийг мэргэжлийн хүмүүс хэлж байна. 
Манай аймаг 106 мянган хүн ам, 29 мянган айл өрхтэй, үүний 50 гаруй хувь нь гэр хороололд амьдарч байна. Шинээр амины сууц барихаар төлөвлөж буй нэгэнд сонголт хийхэд нь тусалж, одоо амьдарч буй   байшин, сууцаа эрчим хүчний хэмнэлттэй, дулаан алдагдалгүй болгох боломжийг олгох нь  өнөөдрийн арга хэмжээний зорилго юм. 

     Барилгын эрчим хүчний аудитор Н.Заанхүү гуай нарнаас эрчим хүч гарган авч, бүр цаашлаад хуримтлуулж хэрэглэх, зарж болох тухай мэдээллийг өгч технологиа танилцуулсан юм. Тэрээр, хүн бүр эрчим хүч үйлдвэрлэгч байх боломжтой. Эрчим хүч өөрөө хязгаарлагдмал нөөц. Монгол Улс ОХУ-аас эрчим хүчээ худалдаж авдаг. Энэ их мөнгийг бид улс эх орондоо үлдээх боломжтой юм. Эрчим хүчээ хэмнэх нь өрх айлын эдийн засгийг хэмнэхийн зэрэгцээ байгаль орчинд ихээхэн эерэг нөлөөг үзүүлнэ” хэмээсэн. 

Нарны эрчим хүчийг олон улсад төвлөрсөн сүлжээтэй зэрэгцээ ажиллах систем, бие даасан цэнэг хуримтлууртай систем, цахилгаан дамжуулах, түгээх төвлөрсөн сүлжээ гэсэн гурван янзаар ашигладаг байна. 

      Монгол Улсад төдийгүй дэлхий дахинд тулгамдаж буй асуудал болох уур амьсгалын өөрчлөлтийн эсрэг Хас банк нэгдэж, ногоон зээлийн талаарх мэдээллээ иргэдэд өгсөн. Тус банк ногоон зээлийг халаагуур, дулаалга, эрчим хүчний хэмнэлттэй байшин гэсэн гурван төрлөөр олгож байгаа талаар Эко банк хариуцсан мэргэжилтэн Б.Энхчулуун хэлсэн. 

Орхон аймаг “Ногоон Эрдэнэт” хөтөлбөр, “2022-2025 онд хэрэгжүүлэх орон сууцны хөтөлбөр”-ийг тус тус   боловсруулж ИТХ-ын хуралдаанаар батлуулан хэрэгжүүлж буй. 
Эдгээр хөтөлбөрт эрчим хүчний хэмнэлттэй, дулаан алдагдалгүй амины орон сууцыг барих төслийг хэрэгжүүлэхээр тусгасан нь  ийн бодит  ажил  болох эхлэлээ тавиад байна. 

Тодруулбал, Баян-Өндөр сумын Эрдэнэ багийн 6га талбайд 60 айл, Оюут багийн Сархиа уулын энгэрт 48га талбайд 300 айлын амины орон сууцны төслийг хэрэгжүүлэхээр төлөвлөсөн бөгөөд өдөрлөгийн үеэр иргэдэд мэдээлэл өглөө. 

     Өдөрлөгт нийслэлийн барилга орон сууц, ногоон технологийн шийдлийн чиглэлээр үйл ажиллагаа явуулдаг 30 ААН, орон нутгийн 10 гаруй ААН оролцож байна. Тэд  орон нутгуудаас Орхон аймаг  анхдагч байж  "Ногоон амины орон сууц" төсөл хэрэгжүүлж, ард иргэдээ тохь тухтай амьдрах бүхий л талын мэдээлэл зөвлөгөөг авах боломжоор хангахад анхаарч буй аймгийн удирдлагуудад талархал илэрхийлсэн. 

Өдөрлөгийг аймгийн ИТХ, Засаг даргын Тамгын газар, Хот байгуулалт барилга захиалагчийн алба, “Монголын амины орон сууцны инновац хөгжлийн төв” ТББ хамтран зохион байгуулж байна. 

Иргэдийн олонх нь байшин барих газраа сонгохдоо тог цахилгаан татсан эсэх, инженерийн шугам сүлжээг нь эхлээд сонирхдог. Тэгвэл өдөрлөгөөр ямар ч дэд бүтэцгүй газар бие даасан дэд бүтэцтэй байшин барих боломжтой,  эрчим хүчээ нараар шийдэх боломжтой, саарал усаа дахин ашиглах технологиор бохирын асуудлаа шийдэх боломжтой гээд сонголт, шийдлээр арвин нэг өдрийг Эрдэнэтчүүд  төв талбайдаа өнгөрүүлж байна. 
                                         

Мэдээллийн төв