ОХУ-ын Буриадын Онцгой байдлын дарга А.А.Марковыг хүлээн авч уулзлаа

ОХУ-ын    Онцгой байдлын яамны  Бүгд Найрамдах Буриад Улс дахь Ерөнхий газрын дарга, Хошууч генерал  Александр Александрович Марков, Онцгой байдлын ерөнхий газрын дэд дарга Д.Намсрай  нарын  албаны хүмүүс өнөөдөр манай  аймагт ажиллаж байна.

    Засаг дарга С.Батжаргал, Засаг даргын орлогч А.Түвшинжаргал нар албаны  хүмүүсийг хүлээн авч уулзан, хилийн бүс нутаг, хоёр орны Онцгой байдлын хамтын ажиллагааны талаар санал солилцов.   Уулзалтын эхэнд Засаг дарга С.Батжаргал “Хоёр улсын Онцгой байдлын систем төр, улсын албандаа нэн чухал салбарын нэг” гэдгийг онцолж,  орон нутгийн санхүү, эдийн засгийн боломждоо түшиглэн Онцгой байдлын салбарын үйл ажиллагаагаа тогтмол дэмжихийг хичээдэг. Орхон аймаг, Эрдэнэт хот бол газар зүйн байрлалын хувьд  ч байгуулагдсан түүх, хөгжлийн явцаараа ч Орос орон, Буриадуудтай ойр байж хамтран ажиллаж ирсэн” гэлээ.

Манай хоёр улсын Онцгой байдлын байгууллагын хамтын ажиллагаа 30 жилийн түүхтэй. Үер усны аюул, ой хээрийн түймэр гээд байгалийн гамшигт үзэгдлүүдэд хүн хүч, техник, хэрэгслээр харилцан тусалж ирсэн хамтын ажиллагааны түүх арвин юм.

    Хошууч,генерал А.А.Марков 2015 онд нутаг дэвсгэрт нь гарсан ой хээрийн түймэрт Монгол Улсын Онцгойгийн 50 залуу гар бие оролцсонд талархаж явдагаа илэрхийллээ.

Сэлэнгэ, Хөвсгөл, Архангай, Булган, Дархан-Уул, Төв зэрэг 6 аймгийн Онцгой байдлын газрын бүсчилсэн удирдлага нь манай Орхон аймгийн Онцгой байдлын газар юм.  Хангай бүс нутагт улирлын чанартай ой хээрийн түймэр, үер усны аюул тогтмол гардаг учир шаардлагатай тоног төхөөрөмж, хувцас хэрэглэлд хамтын ажиллагааны хүрээнд  дэмжлэг үзүүлэхийг Засаг дарга С.Батжаргал хүссэн.

    Тэрээр, “Шаардлагатай үе гарахад онцгой байдлын цагийн нөхцөл байдлын мэдээлэл солилцоо нэн чухал байдаг. Бид өдөр тутам бүс нутгийнхаа цаг агаарын мэдээллийг танай талд тогтмол хүргүүлж байгаа. Энэ мэтчилэн цаг үеийн нөхцөл байдлаа харилцан мэдээлэх үйл ажиллагаа цаашид улам сайжирна гэдэгт итгэлтэй байна” гэсэн.

Хошууч,генерал А.А.Марков хоёр улсын Онцгой байдлын байгууллагуудын шуурхай жижүүрийн үйл ажиллагаагаар дамжуулан яаралтай мэдээлэл дамжуулах үйл ажиллагааг эрчимжүүлж, тогтмолжуулах шаардлагатай байгааг ч хэлж байв.

Уулзалтын дараа Онцгой байдлын Ерөнхий газар, ОХУ-ын Онцгой байдлын яамны Бүгд Найрамдах Буриад Улс дахь Ерөнхий газар хоорондын “Онгой байдлаас урьдчилан сэргийлэх тэмцэх, тэдгээрийн үр дагаврыг арилгах талаар 2023-2025 онд хамтран ажиллах төлөвлөгөө”-г ОБЕГ-ын дэд дарга, хурандаа Д.Намсрай, Хошууч,генерал А.А.Марков нар үзэглэлээ.

Уг төлөвлөгөөнд, үер, ой хээрийн түймэр, хүн, мал амьтан, ургамлын гоц халдварт өвчнөөс урьдчилан сэргийлэх хариу арга хэмжээ авч хэрэгжүүлэх чиглэлээр 11 арга хэмжээг төлөвлөжээ.

Мэдээллийн төв