М.Жанболат: Төрийн албаны II улирлын ерөнхий шалгалтын бүртгэл маргааш эхэлнэ

Төрийн албаны тухай хуульд нэмэлт өөрчлөлт орж, төрийн албаны ерөнхий шалгалтыг улиралд нэгээс доошгүй удаа зохион байгуулах зохицууулалтыг тусгасан. 
Энэ оны  хоёрдугаар улирлын ерөнхий шалгалтын бүртгэл энэ сарын 19-нд буюу маргааш 09:00 цагт цахимаар  эхэлж, тавдугаар сарын 4-ний 09:00 цаг хүртэл үргэлжилнэ. 
Үүнтэй холбоотой мэдээллийг аймгийн ЗДТГ-ын Төрийн захиргаа, удирдагын хэлтсийн дарга М.Жанболат  өглөө. 

Төрийн албаны салбар зөвлөл энэ оны нэгдүгээр сарын 25-ний өдрийн хуралдаанаар “Төрийн албаны тусгай шалгалт өгөх болзол, журам”, Төрийн албан тушаалд шатлан дэвшүүлэх журам” зэрэг таван журмыг нэгтгэсэн.   Ингээд “Төрийн албаны шалгалт өгөх болзол болон шатлан дээшлүүлэх, сонгон шалгаруулах журам” болгон шинэчлэн баталж  өнгөрсөн гуравдугаар сарын 31-ний өдрөөс эхлэн мөрдөж байна. 

      Мөн ерөнхий шалгалт нь улсын хэмжээнд улиралд нэгээс доошгүй удаа зохион байгуулах хуваарьт ерөнхий шалгалт, аймаг, нийслэл дэхь хүний нөөц бүрдүүлэлтийг нэмэгдүүлэх зорилгоор Төрийн албаны зөвлөлийн Салбар  зөвлөлийн захиалгаар хэсэгчлэн зохион байгуулах ерөнхий шалгалт буюу захиалгат ерөнхий шалгалт гэсэн хоёр төрөлтэй болсон. 
Шалгалт өгөх иргэн нь Монголын Улсын иргэн байх, дээд боловсролтой байх /Төрийн албаны туухай хуулийн 10.2-т заасан туслах албан тушаалд мөн хуулийн 22.1.2-т заасан шаардлага хамаарахгүй, Эрүүгийн хуульд заасан авлига, албан тушаалын гэмт хэрэг үйлдэж шүүхээр ял шийтгүүлж байгаагүй байх, сэтгэцийн өвчин эмгэгүй байх гэх мэт болзлыг хангасан байна. 

      Өнгөрсөн гуравдугаар сард зохион байгуулсан ерөнхий шалгалтад 119 иргэн оролцохоор бүртгүүлснээс 102 иргэн буюу 85,7 хувь нь оролцож 33 иргэн тэнцсэн. 
Засгийн газраас “Төрийн улс төрийн албан тушаалд ажилласан хугацааг төрийн захиргааны албан тушаалын зохих ангилалд ажилласан хугацаанд дүйцүүлэн тооцох журам”-ыг баталсан. Үүгээр улс төрийн албан тушаалаас төрийн захиргааны албан тушаалд шилжин ажиллах хүсэлтэй иргэд ерөнхий шалгалтаар нөөцөд бүртгэгдэж , тусгай шалгалтад өрсөлдөн төрийн захиргааны албан тушаалд шилжин ажиллах боломжтой болсон билээ. 

2019 онд аймгийн ерөнхий шалгалтад 42 иргэн тэнцэж байсан бол 2020 онд 122 иргэн, 2021 онд 156 иргэн, 2022 онд 93 иргэн, 2023 онд 33 иргэн тус тус тэнцэн нийт 446 иргэн төрийн жинхэнэ албаны нөөцийг бүрдүүлээд байна.  Эдгээр нөөцөд байгаа иргэдээс 2022 онд 39 иргэн, 2023 онд эхний гурван сарын байдлаар 23 тусгай шалгалт өгч төрийн албанд нэр дэвшин ажиллаж байгаа ажээ.