ГЭР ХОРООЛЛЫН 18 МЯНГАН ХЭРЭГЛЭГЧ ЭРЧИМ ХҮЧНИЙ НАЙДВАРТАЙ ЭХ ҮҮСВЭРЭЭР ХАНГАГДАНА

Аймгийн Засаг даргын зөвлөлийн 2023 оны VII хуралдаанаар   хотын  2023- 2024 оны өвөлжилтийн бэлтгэл хангах ажлын  төлөвлөгөөг хэлэлцэж,  Хот тохижуулах, ЭБЦТС, Эрдэнэт-Ус,  СӨХ, Орхон АЗЗА зэрэг мэргэжлийн байгууллагууд сонсгол хийлээ. 

“ЭБЦТС” ТӨХК дээр Дэлхийн банкны Олон улсын хөгжлийн ассоциацийн хөнгөлөлттэй зээлээр “Эрчим хүчний II” төслийн хүрээнд Баян-Өндөр сумын “Цахилгаан түгээх сүлжээний шинэчлэлт”-ийн ажил хийгдэж буй.   Төслийн хүрээнд гэр хорооллын 12 багийн 66 дэд станцын шугамыг шинэчлэх юм. Одоогийн байдлаар тулгуур угсралтын ажил 90 хувьтай, утас татах ажил 79 хувьтай, орон сууцны цахилгаан хангамж сайжруулах, ухаалаг тоолуур суурилуулах ажил 59 хувьтай үргэлжилж байна гэж тус компанийн ахлах инженер М.Мөнхсүлд хэллээ. 
Төсөл ирэх наймдугаар сард дуусах бөгөөд үр дүнд нь 18 мянган хэрэглэгч цахилгаан эрчим хүчний найдвартай эх үүсвэрээр хангагдаж, гэр хорооллын зарим багуудын хүчдэлийн уналтгүй болох юм.