Аймгийн ИТХ-ын зөвлөлийн V хуралдаанаар “Ач санах”, “Анхдагч” хөтөлбөрийн 2022 оны хэрэгжилтийн тайланг хэлэлцлээ

Ахмад өндөр настнуудынхаа эрүүл мэнд, нийгмийн хамгааллыг нь сайжруулах, нийгмийн амьдралд идэвхтэй оролцуулах, улс эх орныхоо хөгжил, бүтээн  байгуулалтад оруулсан хувь нэмрийг  алдаршуулах нь энэхүү хоёр хөтөлбөрийн зорилго юм.   Орхон аймаг, Эрдэнэт хот 12 мянган ахмадтай. Үүний 30,9 % нь эрэгтэй, 69,1% нь эмэгтэй байна.

“Ач санах”  хөтөлбөрийн хүрээнд  Баян-Өндөр, Жаргалант сумдын 560 ахмад настныг хувийн хэвшлийн дөрвөн эмнэлэгт үнэ төлбөргүйгээр 10 хоног хэвтэн эмчлүүлжээ.  Улс орон даяар зохион байгуулагдаж буй “Эрт илрүүлгийн үзлэг”-т давхардсан тоогоор 3047 ахмад настан эрүүл мэндийн урьдчилан сэргийлэх үзлэгт хамруулж эрүүл мэндийг нь дэмжсэн байна. Мөн “Буурлын чагнуур” ТББ-тай хамтран хүнд хэлбэрийн хөгжлийн бэрхшээлтэй  90 ахмадад гэрийн тусламж олгосон. 2022 онд “Ач санах хөтөлбөр” 70 сая төгрөгийн санхүүжилтээр гурван зорилт 20 арга хэмжээг төлөвлөн хэрэгжүүлсэн ажлаас товч танилцуулахад ийм байна.

Тус хөтөлбөрийн биелэлт 97  хувьтай дүгнэгдэж аймгийн ИТХ-ын хуралдаанаар хэлэлцүүлэхээр шийдвэрлэлээ.

Аймгийн ИТХ  2021 онд 50 дугаар тогтоолоор  “Анхдагч” хөтөлбөрийг хэрэгжүүлэхээр баталсан.  Эрдэнэт хотын бүтээн байгуулалтад  хувь нэмрээ оруулсан Анхдагч-илгээлтийн эздийг нэгдсэн бодлого, зохион байгуулалтад оруулах, хөдөлмөр бүтээлийг нь алдаршуулах, хүндэтгэл үзүүлэх нь энэхүү хөтөлбөрийн зорилго юм.

Манай аймагт анхдагчдын эрх ашгийг хамгаалах, тэдэнд зориулан үйл ажиллагаа явуулж буй  таван холбоодод нийт 2029 гишүүн байна.   Тодруулбал,   

•        МАНЗ-Баатар холбоо 395
•        Төрийн байгууллагуудын Соёмбо холбоо 390
•        Эрдэнэтийн овооны анхдагч илгээлтийн эздийн холбоо 897
•        Барилгачин дайчдын холбоо  143
•        Залуу насаа эргэн дурсахуй холбоо 203 гишүүнтэй  байна. 

2022 онд хөтөлбөрийн хүрээнд  гурван зорилт 10 үйл ажиллагааг хэрэгжүүлжээ. “Анхдагч илгээлт”-ийн эздийн дунд зохион байгуулсан олон талт үйл ажиллагаанд 1000 орчим ахмад хамрагдсан байна.  Хөтөлбөрийн хүрээнд уламжлал болсон нэг арга хэмжээ нь “Баялаг бүтээгч ахмад” өдөрлөг юм. Үүнд, өрхийн үйлдвэрлэл эрхэлдэг 25 анхдагч ахмад оролцож бараа бүтээгдэхүүнээ борлуулан өөрсдийн арга зүйн туршлагаас иргэдэд сурталчилжээ.

Дэмжлэг туслалцаа шаардлагатай 158 анхдагчдад хүнсний багц, хэвтрийн өвчтэй 135 анхдагчдад гэр эргэлтийг холбоодоор дамжуулан гүйцэтгэсэн байна.