Сургууль цэцэрлэгийн засвар үйлчилгээнд 1,2 тэрбум төгрөг зарцуулжээ

Аймгийн боловсролын салбарыг 2021-2024 онд хөгжүүлэх хөтөлбөр”-ийн 2022 оны хэрэгжилтийг аймгийн Иргэдийн төлөөлөгчдийн хурлын зөвлөлөөр хэлэлцлээ. 

        Өнгөрөгч онд нийт 4 зорилтын хүрээнд 56 үйл ажиллагааг төлөвлөн хэрэгжүүлсэн талаар танилцууллаа. Тодруулбал: Боловсролын үйлчилгээг орон нутгийн онцлогт нийцүүлэн тэгш, хүртээмжтэй, чанартай хүргэж, эрэлт хэрэгцээнд нь нийцсэн, сурч хөгжих таатай орчин бүрдүүлэх зорилтын хүрээнд, Улсын төсвийн 5,6 тэрбум төгрөгийн хөрөнгө оруулалтаар 1 дүгээр сургуулийн өргөтгөлийн барилгыг ашиглалтад оруулав. 3 дугаар сургуулийн барилгыг буулгаж шинээр барих, 8 дугаар сургуулийг өргөтгөх ажлууд тус тус хийгдэж,  орон нутгийн төсвийн хөрөнгө оруулалтаар Цагаанчулуут багт 150 хүүхдийн цэцэрлэг шинээр барих зэрэг бүтээн байгуулалтын ажлууд хийжээ.  
    Түүнчлэн урлагийн төрөлжсөн сургалттай “Уран эгшиг” сургуулийн хичээлийн байрыг орон нутгийн нөөц бололцоонд тулгуурлан шийдвэрлэж, шаардлагатай техник хэрэгсэл, хэрэглэгдэхүүнээр ханган ажиллав. Мөн  2022 онд орон нутгийн төсвийн 1,2 тэрбум төгрөгийн хөрөнгө оруулалтаар сургалтын 11 байгууллагад засвар, үйлчилгээ хийгдэж сургалтын орчин нөхцлийг сайжруулсан байна. 

Мэдээллийн төв