"Бүргэдийн баяр 2023"-ыг зорин ирснээр Казах түмний өв соёл, ёс заншил, тоглоом наадгайтай танилцах боломжтой

Казах түмний Наурызын баярыг угтан мөн  тусгай сонирхлын аялал жуулчлалыг  хөгжүүлэх зорилгоор “Бүргэдийн  баяр-2023” арга хэмжээг энэ сарын 18-нд Орхон аймаг, Эрдэнэт хотод анх удаа зохион байгуулахаар бэлтгэл ажлыг хангаж байна.  Өнөөдөр Засаг даргын орлогч, ажлын хэсгийн ахлагч  А.Түвшинжаргал болон Баян-Өлгий аймгаас ирсэн 10 бүргэдчиний төлөөлөл хэвлэлийн бага хурал хийж, иргэдэд мэдээлэл өглөө. 

Орхон аймагт анх удаа зохион байгуулж "Бүргэдийн баяр"  арга хэмжээнд оролцохоор Баян-Өлгий аймгаас 11 хүн  1700 км замыг туулан өчигдөр манай аймагт ирсэн юм. 
Монголын Бүргэдчид  холбооны тэргүүн Ахбапи КЕНШИЛИК “Энэхүү арга хэмжээнд өндөр ач холбогдол өгч зохион байгуулж буй Орхон аймгийн ЗДТГ, Орхон аймаг дахь нутгийн зөвлөлийн гишүүддээ талархал илэрхийлье” гэлээ.  

Тэрээр, бид  ахмад, дунд, залуу үеийн төлөөллийн өв тээгчдийн хамтаар Орхон аймагт ирээд байна. 20 гаруй жилийн турш Улаанбаатар хотод уламжлал болгон зохион байгуулдаг Казах түмний үндэсний баярыг орон нутгаас анх удаа Орхон аймаг түүчээлэн зохион байгуулж байгаад туйлын сэтгэл өндөр байна” гэв. 
Засаг даргын орлогч А.Түвшинжаргал Орхон аймагт  Монгол Улсын үндэстэн, угсаатан бүр ажил хөдөлмөр эрхлэн аж төрөн амьдран суудаг онцлогтой. Угсаатан бүрийн өвөрмөц ёс заншил, өв соёлыг түгээн дэлгэрүүлэн, сурталчлахыг аймгийн удирдлагууд зорьж байгаа. Үүний эхлэл Казах түмний баяр "Бүргэдийн баяр" болж байна” гэсэн. 

"Бүргэдийн баяр-2023” баярыг зорин ирсэн олонд бүргэдээр ан хийх, тулам булаалдах, бүргэд сургасан байдлыг үзүүлэх үзүүлбэр болон Казах түмний урлагийн тоглолт, тоглоом наадгай, уламжлалт гар урлалыг таниулах гээд  үндэсний олон өв соёлыг нэг дороос үзэж харах боломжтой юм. 

Та бүхнийг энэ сарын 18-нд Наадмын талбайд болох "Бүргэдийн баяр-2023" арга хэмжээнд өргөнөөр оролцохыг урьж байна.