“ЕСБХБ-ны “Ногоон хот” хөтөлбөрийг Орхон аймагт хэрэгжих боломжтой” гэв

Европын сэргээн босголт, хөгжлийн банкны санхүүжилтээр хэрэгжиж байгаа “Эрдэнэт хотын үерийн далан инженерийн байгууламж шинэчлэх, гэр хорооллын усан хангамжийг сайжруулах” “Эрдэнэт хотын гамшигт тэсвэртэй байдал” төслүүд Орхон аймаг, Эрдэнэт хотод хэрэгжиж байна. 

2022 онд дээрх төслүүдийн зураг төсвийн болон зөвлөх үйлчилгээний ажлууд хэрэгжиж, тендер зарлагдаад байгаа юм.  Дээрх төслийн хүрээнд “Эрдэнэт Ус” ОНӨХК дээр компанийн чадавхыг сайжруулах хөтөлбөр хэрэгжиж буй. Техникийн туслалцааны төсөл хариуцсан Румын Улсын “BDO” компанийн бизнесийн ахлах зөвлөх Сорин Кайн эдгээр өдрүүдэд “Эрдэнэт Ус” ОНӨХК дээр ажиллаж байна. 

    Өчигдөр  ноён Сорин Кайныг албаныхан хүлээн авч уулзан санал солилцлоо. Тэрээр, дэлхий нийтийн уур амьсгалын өөрчлөлтийн нөлөөллийг бууруулахад улс орнуудын хамтын ажиллагааг дэмжих зорилт бүхий ЕСБХБ-ны “Ногоон хот” хөтөлбөрийн талаарх мэдээллийг өгөв. 

“Ногоон хот” хөтөлбөрийн хүрээнд хотуудад тулгамдаж буй асуудлыг байгаль орчинд ээлтэй арга, техник технологиор шийдэх төсөл хөтөлбөрийг санаачлах, үйл ажиллагааны төлөвлөгөөг хэрхэн боловсруулж, хэрэгжүүлэх талаар мэдээлэл зөвлөгөөг өгсөн.    “Ногоон хот” хөтөлбөр нь 2016 оноос анх гурван улсад хэрэгжиж эхэлсэн бөгөөд өдгөө дэлхийн 52 улс оронд хэрэгжиж байгаа юм. Нийслэл Улаанбаатар хот 2018 онд “Ногоон хот” хөтөлбөрөө батлуулж, “Хатуу хог хаягдлын менежмент”, “Эрчим хүчний хэмнэлттэй орон сууц барих” төсөл зэрэг хэд хэдэн төсөл амжилттай хэрэгжиж байна.