“Улсын аварга малчин”, “Улсын аварга тариаланч”, “Улсын аварга тариаланч хамт олон”-ны шагнал гардууллаа

XVII жарны “Үзэсгэлэн болгогч” хэмээх усан туулай жилийн босгон дээр “Улсын аварга малчин”, “Улсын аварга тариаланч”, “Улсын аварга тариаланч  хамт олон” тодорч, шагналыг нь УИХ-ын гишүүн Д.Батлут, аймгийн ИТХ-ын дарга  Д.Мөнхбат, Засан дарга С.Батжаргал болон Жаргалант сумын Засаг дарга Б.Зоригтбаяр нар  гардууллаа.

ЖАРГАЛАНТ СУМЫН ТАВ ДАХЬ “УЛСЫН АВАРГА МАЛЧИН”-аар  Х.ЭРДЭНЭБОЛД ТОДРОВ

Жаргалант сумын Дулаан Уул багийн Аргуунд тарган тавтай өвөлжиж буй Хасбаатарын Эрдэнэболд сар шинийн босгон дээр Засгийн газрын шийдвэрээр  “Монгол Улсын аварга малчин” цол тэмдгээр шагнууллаа.

Тэрээр, буянт мал сүргээ малласан 30 дахь жилдээ “Монгол Улсын аварга малчин” гэх эрхэм хүндтэй шагналыг хүртэж байна.  Тэртээ 1994 онд гэргий С.Туяацэцэгтэйгээ гэр бүл болж, гурван сайлын үнээ, 30 богтойгоор амьдрал ахуйгаа эхэлж байсан тэд ийн төр, түмэндээ хөдөлмөрөө үнэлүүллээ.  2020-2022 жилийн эцэст 813-969 толгой мал тоолуулан өмнөх оныхоос 17.3 хувиар төлөөр нь өсгөж, малаа хорогдолгүй онд оруулан жилд 100 эхээс 100 хувиар төл бойжуулан авсан, малч ухаантай хөдөлмөрч малчин юм.

2015 онд өөрийн санаачилгаар 13 малчин өрхтэй хамтран “Баялаг-Аргуун” хоршоог үүсгэн байгуулж, гишүүдийн хамтаар өөрийн эзэмшлийн 5 га талбайд ногоон тэжээл, царгас тариалж, онд мэнд тарган тавтай орох бэлтгэлээ базаасаар ирсэн хашир туршлагатай малчин.  Мөн баг, сумынхаа 30 гаруй айл өрхийг 1000 гаруй толгой халуун хошуут малаар малжуулж, мал маллах уламжлалт арга ухааныг залуу малчдад өвлүүлж, малчдын залуу халааг бэлтгэн хойч үедээ үлгэрлэж, хөдөлмөр бүтээлээрээ манлайлж явна.

 “БҮТЛИЙН УНДАРГА” ХХК   МОНГОЛ УЛСЫН ЕСӨН  УДААГИЙН АВАРГА ТАРИАЛАНЧ ХАМТ ОЛНООР ШАЛГАРЛАА  

Эх орноо эрүүл хүнсээр хангах их үйлсэд нөр их хөдөлмөрөө зориулж яваа Л.Батсүх захиралтай “БҮТЛИЙН УНДАРГА” ХХК-ийн хөдөлмөрч хамт олон 20222 оны ажил үйлсээрээ манлайлж,  “Монгол Улсын аварга тариаланч хамт олон”-оор шалгарлаа.

Жаргалант сумын “БҮТЛИЙН УНДАРГА ” ХХК нь 1996 онд анх байгуулагдсан цагаас эхлэн газар тариалангийн салбарт тогтвортой үйл ажилллагаа явуулж буй тэргүүний сайн туршлагатай хамт олон билээ.  Хөрсний үржил шимийг сайжруулах, га-аас авах ургацыг нэмэгдүүлэхэд олон ажлыг санаачлан үр дүнтэй хэрэгжүүлэхийн зэрэгцээ техникийн шинэчлэлийг 100 хувьд хүргэж хураан авах улаан буудайн чанарыг сайжруулж, нэгжээс авах ургацын хэмжээг улсын дунджаас тогтмол дээгүүр гарган ажиллаж байна.

Мөн Монгол Улсын шилдэг татвар төлөгчөөр гурван удаа, аймгийн шилдэг татвар төлөгчөөр хоёр удаа шалгарсан ААНБ юм.

ЖАРГАЛАНТ СУМААС 18 ДАХЬ УДААГИЙН “МОНГОЛ УЛСЫН АВАРГА ТАРИАЛАНЧ” ТОДОРЛОО

“УЛСЫН АВАРГА ТАРИАЛАНЧ” шагналын эзэн "Алтан тошлой" ХХК-ийн комбайнч Энхтайваны Мөнхтулгад шагналыг нь  гардууллаа. Тракторчин, комбайнчнаар 17 жил ажиллаж байгаа Э.Мөнхтулга  нь  2005 онд Орхон аймгийн ХАА-н МСҮТ-ийг трактор комбайнчнаар төгссөн.  Тэр цаг үеэс өнөөг хүртэл  “Алтан тошлой” ХХК-даа үр бүтээлтэй ажиллаж байгаа, хөдөлмарч залуу юм.

2022 онд улаан буудайн тариалалт 600 га-д хийж, шууд хураалтаар 600 га талбайгаас 1260,0 тн улаан буудай буюу га-аас 21 цн ургац хурааж, 2180 га-д ургамал хамгааллын бодис, бордоо цацаж, 1350 га талбайд уриншийн боловсруулалт хийж нийт 3530 га-ийн ажил хийж гүйцэтгэжээ.   Мөн жилд дунджаар 120-150 тн ногоон тэжээл хадаж өөрийн аж ахуй болон сумын өвс тэжээлийн фондод нийлүүлдэг ажилч хичээнгүй залуу ийн хөдөлмөрөө төр түмэндээ үнэлүүлж “УЛСЫН АВАРГА ТАРИАЛАНЧ” боллоо.