"Нөхөрлөл-Тэмүүлэл-Амжилт" уриатай өвлийн спортын хоёр наадам амжилттай өндөрлөлөө

Монголын бүх ард түмний спортын өвлийн XVI наадам,  Монголын хүүхдийн спортын өвлийн VII наадам  Нөхөрлөл-Тэмүүлэл-Амжилт  уриан дор  найм хоногийн хугацаанд амжилттай зохион байгуулагдаж өндөрлөлөө.  Өвлийн спортын наадмын  зургаан төрөлд   нийслэлийн 7 дүүрэг, 12 аймгаас 244 тамирчин 17 дасгалжуулагч, Монголын хүүхдийн спортын өвлийн VII  наадам  417 тамирчин 24 дасгалжуулагч 567  медалийн төлөө хурд, хүч, авхаалж самбаагаа сорин өрсөлдөв. 

    Засгийн газрын 2018 оны “Журам батлах тухай” 183 дугаар тогтоолын хавсралтаар батлагдсан “Улсын хэмжээний спортын наадам зохион байгуулах журам”-ын 2.1-д заснааар Монголын бүх ард түмний спортын зуны болон өвлийн наадмыг дөрвөн жилд нэг удаа, Монголын хүүхдийн спортын наадмын зуны болон өвлийн төрлийг хоёр жил тутам нэг удаа зохион байгуулахаар журамласан байдаг. 

     Энэ удаагийн наадмын онцлог нь Биеийн тамир,  спортын улсын хорооноос наадмыг зохион байгуулах эрхийг Орхон аймагт  олгож, Засаг даргатай гэрээ байгуулснаараа онцлог байв. 
Орхон аймаг орон нутагтаа зохион  байгуулах эрхийг авснаас хойш  300 орчим   хүний бүрэлдэхүүнтэйгээр багагүй хугацаанд  бэлтгэл ажлыг хангасан юм. 
Аймаг, орон нутгийнхаа онцлогийг гаргаж, орон нутгаа сурталчлах нь  зохион байгуулагч аймгийн давуу тал байв.  Орхон аймаг, Эрдэнэт хотын бэлэг тэмдэг  хүчит арслангаар Монголын бүх ард түмний спортын өвлийн XVI наадмыг бэлэгдсэн бол  Монголын хүүхдийн спортын өвлийн VII наадмын бэлэгдэл  уламжлал ёсоор “ГАЛХҮҮ”  байлаа. 

    Орхон аймаг, Эрдэнэт хотыг зэс, оюу өнгөөр тодорхойлж, шаргал өнгөөр зэсийг, номин ногоон өнгөөр оюуг, цайвар цэнхэр өнгөөр мөсийг бэлэгдсэн энэ удаагийн өвлийн спортын наадмыг олон улсын жишигт нийцэхүйц  өндөр зохион байгуулалттай  боллоо хэмээн баг тамирчид, зочид төлөөлөгчид онцолсон.
Тухайлбал, наадмын зохион байгуулалтын талаар Биеийн тамир, спортын улсын хорооны дарга О.Баттулга “Орхон аймаг өвлийн спортын наадмын зохион байгуулалтад өндөр жишиг  тогтоолоо” хэмээсэн бол  Зэвсэгт хүчний "Алдар" спорт хорооны дарга, МУГТ Г.Өсөхбаяр “Монголын бүх ард түмний спортын өвлийн XVI наадам,  Монголын хүүхдийн спортын өвлийн VII наадам  Нөхөрлөл-Тэмүүлэл-Амжилт  уриан дор  Орхон аймаг, Эрдэнэт хотноо олон өдрийн турш амжилттай зохион байгууллаа. Наадамд ач холбогдол өгч, олон улсын төвшинд хүрэхүйцээр зохион байгуулсанд хувийн зүгээс болон спорт хорооныхоо баг тамирчдын нэрийн өмнөөс баяр хүргэе” гэв. 

Энэ жилийн өвлийн спортын наадам оролцогчдыг анх удаа цахимаар бүртгэсэн, орон нутгаас анх удаа МҮОНРТВ-ийн Спортын суваг  шууд дамжуулалт хийсэн, тэмцээний зам, талбайг олон улсын стандартад нийцүүлэн зассан гээд  “анхны” тодотголоор дүүрэн наадам болов. 

Нийслэлийн 7 дүүрэг, 12 аймгаас 700 гаруй тамирчд хурд, хүч авхаалж самбаагаа сорин өрсөлдөж багийн дүнгээр шалгарсан шилдгүүдийг хаалтын арга хэмжээний үеэр алдаршуулсан юм. 
Монголын бүх ард түмний спортын өвлийн XVI наадамд багийн дүнгээр 

• I байр- “АЛДАР” спорт хороо 
• II байр - “ОРХОН” аймаг 
• III байр- “ХИЛЧИН” спорт хороо 
• IV байр - “БАЯНГОЛ” дүүрэг 
• V байр- “ТӨВ” аймаг 
• VI байр “СҮХБААТАР” дүүрэг шалгарлаа 

Монголын хүүхдийн спортын өвлийн VII наадамд багийн дүнгээр

• I байр- ХӨВСГӨЛ аймаг 
• II байр- БУЛГАН аймаг 
• III байр- ТӨВ аймаг 
• IV байр- ОРХОН аймаг 
• V байр- СҮХБААТАР дүүрэг 
• VI байр- ХАН-УУЛ дүүрэг 

Спортын төрөлжсөн сургалттай Ерөнхий боловсролын шилдэг сургуулиар Орхон аймгийн “Ирээдүйн-Одод” сургууль тус тус  шалгарсан. 

Ийн  Нөхөрлөл-Тэмүүлэл-Амжилт  уриан дор Монгол орны өнцөг булан бүрээс ирсэн 700 гаруй тамирчид нэгдэж, найм хоногийн турш спортоор  нөхөрлөн “Би Монгол тамирчин” сүлд дуугаа  эгшиглүүллээ.