Босоо удирдлагатай төрийн байгууллагуудын цалингийн нэмэгдлийг судлах ажлын хэсэг байгуулна

Засаг даргын зөвлөлийн хурлаар Цалингийн нэмэгдэл, Хүүхдийн мөнгөний олголт зэрэг асуудлаар холбогдох байгууллагуудын мэдээллийг сонслоо. Оны өмнө буюу арванхоёрдугаар сарын 2-нд аймгийн ИТХ-ын хуралдаанаар Нэгжийн тухай хууль, Төсвийн тухай хуулийн хүрээнд орон нутгийн төсөвт байгууллага буюу орон нутгаас цалинждаг төрийн албан хаагчдын цалинг 2023 оны нэгдүгээр сарын 1-нээс эхлэн 40 хувиар нэмэгдүүлэхээр шийдвэрлэсэн.

     Үүний дагуу Хот тохижуулах зэрэг орон нутгийн төсөвт байгууллагын ажилтан алба хаагчдын цалин 40 хувиар энэ сарын 1-ний өдрөөс нэмэгдсэн билэ. Харин улсын төсвөөс цалинждаг босоо удирдлагатай төрийн байгууллагуудын цалин нэмэгдээгүйгээс улбаатай цалингийн зөрүү үүсээд байгаа юм.  Аймгийн удирдлагуудын хувьд төрийн байгууллагын бүх шатны ажилтан алба хаагчдын цалинг адил төвшинд нэмэх байр суурьтай байгаа гэдгээ илэрхийлсэн.

      Засаг дарга С.Батжаргал “Босоо удирдлагатай  байгууллагуудыг  цалинг нэмэхдээ төрийн байгууллагын бүх шатны ажилтан, албан хаагчдыг хамруулж нэмэх нь зүйтэй. Харин хуулийн ямар боломж байна вэ гэдгийг ажлын хэсгээрээ судалж, тооцооллыг гаргах нь зүйтэй” гэсэн юм.

Тус ажлын хэсгийг Засаг даргын орлогч А.Түвшинжаргал ахлах бөгөөд салбар салбарын төлөөллийг оролцуулахаар тогтов. Үүниий дараа аймгийн ИТХ-ын хурлын хуралдаанаар хэлэлцүүлж, эцсийн шийдвэрийг гаргах юм. Зөвлөлийн хурлаар хэлэлцсэн дараагийн асуудал нь Хүүхдийн мөнгө олгох тухай байв. Аймгийн ИТХ-ын ээлжит бус VII хуралдаанаар хүүхдийн мөнгийг бүх хүүхдэд олгох нь зүйтэй гэсэн асуудлыг дэмжиж Улсын Их Хурал, Засгийн газарт уламжлуулах тогтоолыг гарган хүргүүлэхээр шийдвэрлэсэн.

     Орхон аймгийн хэмжээнд 2023 оны нэгдүгээр сарын байдлаар 38109 хүүхэд бүртгэлтэй байгаагаас 31409 хүүхэд хүүхдийн мөнгөн тэтгэмжид хамрагдаж, 6700 орчим буюу 17 хувь нь хасагдсан.   Хүүхдийн мөнгөнөөс хасагдсан, мэдээлэл нь зөрсөн иргэд хүүхдийн мөнгөнд хамрагдах хүсэлтээ дахин гаргаж, хоёрдугаар сарын 8-ны дотор холбогдох байгууллагуудад нь хандан мэдээллээ засуулах ёстой юм байна.

Учир нь хоёрдугаар сарын 8-наас 16-ны хооронд ХНХЯ-наас өрхийн амжиргааны төвшин тогтоох судалгааг хийх бөгөөд, 16-наас хойш иргэн таны хүүхэд хүүхдийн мөнгөнд хамрагдсан эсэх мэдээллээ шалгах боломжтой гэх мэдээллийг өглөө.