Биеийн тамир, спортын улсын хорооны ажлын хэсэг манай аймагт ажиллалаа

Монголын бүх ард түмний спортын  өвлийн 16 дугаар их наадам, Монголын хүүхдийн спортын өвлийн 7 дугаар наадам манай аймагт зохион байгуулагдахтай холбоотойгоор Биеийн тамир, спортын улсын хорооны ажлын манай аймагт ажиллалаа. 
Орхон аймгийн хувьд аймгийн Засаг даргын орлогч А.Түвшинжаргалаар ахлуулсан ажлын хэсэг байгуулагдаж, 7 дэд хороод хариуцсан чиглэлээрээ бэлтгэл бэлэн байдлыг ханган ажиллаж байна. 
        Спортын наадмын тэмцээн уралдаан нь хоккейн талбай, сархиа цанын бааз, цэнгэлдэх хүрээлэн гэсэн 3 байршилд явагдах бөгөөд өнөөдрийн байдлаар уралдааны зам талбайн  засвар, сайжруулалт хийгдэж бэлтгэл хангагдаж байна. Түүнчлэн спортын наадмын нээлт хаалтын үйл ажиллагаа болон наадмын бэлэгдэл, уриа зэргийг гаргахдаа Орхон аймгийн онцлог, давуу талыг харуулсан зорилгоор төлөвлөн хийсэн талаар танилцууллаа. 
        Урьдчилсан мэдүүлгээр 17 байгууллагын 500 гаруй тамирчин оролцохоор мэдүүлгээ ирүүлсэн бөгөөд нэрэн мэдүүлгийн цахим бүртгэл 1-р сарын 18-ыг хүртэл биеийн тамир спортын улсын хорооны цахим хаягаар хийгдэнэ. 
          Наадмын зохион байгуулалтын баг болон тамирчдыг оролцуулахдаа жендерийн тэгш оролцоог хангах тал дээр анхаарах шаардлагатайг биеийн тамир спортын улсын хорооны гадаад харилцаа, мэдээлэл технологийн хэлтсийн дарга Н.Оюунбат хэллээ. 
        Ирэх хоёр дугаар сарын 7-оос 13-ыг дуустал долоо хоногийн турш спортын 6 төрлөөр Монголын өвлийн спортын шилдэг тамирчид хурд хүч, авхаалж самбаагаа сорин нийт 526 багц медалийн төлөө өрсөлдөх юм. 
        Энэ жилийн хувьд Монголын бүх ард түмний спортын  өвлийн 16 дугаар их наадам, Монголын хүүхдийн спортын өвлийн 7 дугаар наадам гэсэн хоёр том наадам анх удаа орон нутагт зохион байгуулагдаж байгаа гэдгээрээ онцлогтой.