Цонх, шилэн хийц үйлдвэрлэгч, ашиглагчдын зөвлөлдөх уулзалт боллоо

Эрчим хүчний хэмнэлттэй дулаан алдагдалгүй цонх, шилэн хийц үйлдвэрлэгч, ашиглагчдын зөвлөлдөх уулзалтыг ЗДТГ, Хот байгуулалт, барилга захиалагчийн албанаас хамтран зохион байгууллаа. Уулзалтад Орхон аймагт цонх, шилэн хийцний үйлдвэрлэл эрхэлдэг 9 аж ахуйн нэгжийн төлөөлөл мөн барилгын компаниуд, холбогдох байгууллагын мэргэжилтнүүд оролцлоо. 

Орхон аймгийн хэмжээнд 2020 оноос хойш орон сууцны 41 блок буюу 2368 айлын, амины орон сууцны 250 блок 400 айлын барилга баригдаж эхэлснээс 27 блок 1745 айлын орон сууц ашиглалтад оржээ. Өнөөдрийн байдлаар угсралтын ажил явагдаж байгаа орон сууцны 29 блокийн 1726 айл, амины орон сууцны 400 айлын ажил үргэлжилж байна. 
2025 он гэхэд 4000 айлын орон сууц баригдана гэх мэдээллийг Хот байгуулалт, барилга  захиалагчийн албаны дарга Ц.Баяржаргал уулзалтын эхэнд өглөө. 

Цонх, шилэн хийц нь барилгын дулаан хамгаалалтын чухал хэсэг.  Монгол Улсад өнөөдрийн байдлаар 5 стандарт, хоёр норм дүрэм мөрдөгдөж байна. 

• MNS 5802:2007 “Барилгын цонх” техникийн ерөнхий шаардлага 
• MNS 5830:2007 “Барилгын хуванцар цонх хаалга” техникийн шаардлага 
• MNS 5874:2008   “Цонх, хаалганы поливинихлорид хэлбэржүүлсэн цувимал эдэлхүүн” техникийн шаардлага 
• MNS 4753:2011  “Наамал шилэн багц” техникийн шаардлага
• MNS 6266:2011 “Барилгын хана, цонхны уулзварын угсралтын заадал” техникийн ерөнхий шаардлага 

Барилгын норм, дүрэм 

• БНбД 23-01-09 “Барилгад хэрэглэгдэх уур амьсгал геофизикийн үзүүлэлт”
• БНбД 23-02-09 “Барилгын дулаан хамгаалалт” 2020 онд шинэчлэн гарч БНбД 25-1-20 “Барилгын дулаан хамгаалал”нэртэй болж өөрчлөгджээ. 

 Норм дүрэм, стандартаа мөрдөж чадаж байна уу, хаанаа алдаа дутагдал гаргаж байна вэ, түүнийгээ хэрхэн сайжруулах вэ, дулаан алдагдалгүй, эрчим хүчний хэмнэлттэй байх ямар шийдэл байна вэ, түүнийг хэрхэн хэрэглээндээ нэвтрүүлэх гэх мэт өргөн хүрээний ойлголт, мэдээллийг үйлдвэрлэгчиддээ олгох нь энэхүү уулзалтын зорилго байв. 

Уулзалтад урилгаар оролцож буй  Эрчим хүчний хэмнэлттэй цонх, шилэн хийц үйлдвэрлэгчдийн нэгдсэн холбооны тэргүүн Л.Гантөмөр “Барилгын цонхонд тавигдаж буй шаардлага үзүүлэлтүүд хангагдахгүй байгаа учраас барилгын цонх дулаан алдагдал ихтэй барилгын хашлага бүтээц болж хувирсан.  Үүнээс улбаалан өрх айлд төдийгүй нийгэм, эдийн засагт ихээхэн хохирол учруулж байна гэлээ. 

Харин ОХУ-ын Пилгингтон үйлдвэрийн Бүсийн захирал Иван Аверкин “Барилгын цонх, шилэн хийц хүмүүсийн ая тухтай амьдрахад маш чухал үүрэгтэй. Ялангуяа 106 мянган хүн амтай, барилгажилт өрнөж буй Эрдэнэт  хотод бүр ч их чухал асуудал” гэдгийг онцлон хэлсэн. 

Мэдээллийн төв