2022 онд БОЭТ-д 241,5 сая төгрөгийн хөрөнгө оруулалт хийснээр тоног төхөөрөмжийн хангалт 92 хувьд хүрэв

ИТХ-ын ээлжит XIII хуралдаан үргэлжилж байна. Хуралдаанаар  аймгийн Засаг даргын 2020-2024 оны үйл ажиллагааны хөтөлбөрийн 2022 оны гүйцэтгэлийн урьдчилсан хэрэгжилтийн биелэлтийн тайланг хэлэлцэж байна. 
    Засаг даргын Үйл ажиллагааны хөтөлбөрийг боловсруулж,  2020 оны арваннэг дүгээр сарын 30-ны өдөр хуралдсан  ИТХ-ын ээлжит II хуралдаанаар хэлэлцүүлж батлуулсан.   “Эрдэнэт хүн - Хүний хөгжлийн цогц бодлого”, “Эрдэнэт хот – Хотын хөгжлийн цогц бодлого”, “Эрдэнэт хүч – Хөгжлийн алсын хараа” гэсэн 3 үндсэн бодлогын хүрээнд 8 бүлэгт 124 зорилтыг хэрэгжүүлэх ажлыг зохион байгуулсан. 
Иргэдийн эрүүл мэндийг дэмжих чиглэлээр...

• ИТХ-ын 2021 оны 08 дугаар тогтоолоор "Эмч" хөтөлбөрийн 2022 оны үйл ажиллагааны төлөвлөгөөг баталсан.  Орон нутгийн  60  сая төгрөгийн санхүүжилтээр хэрэгжиж буй уг хөтөлбөрийнн хэрэгжилт 96 хувьтай байна. Хөтөлбөрийн хүрээнд төгсөлтийн дараах сургалтад эмч мэргэжилтнүүдийн 12.9 хувь нь, Нийгмийн дэмжлэгт нийт эрүүл мэндийн ажилтны 17 хувь нь тус тус хамрагджээ. 
•  БОЭТ-ийн харьяа Эрүүл мэндийг дэмжих төвд улсын болон орон нутгийн төсвийн хоёр тэрбум төгрөгийн хөрөнгө оруулалатыг зарцуулж, 34 нэр төрлийн багаж тоног төхөөрөмжөөр хангав. 
•   Халдварт бус өвчний эрт илрүүлгийг эрчимжүүлэхээр орон нутгаас 12  сая төгрөгийг шийдвэрлэж хөх, умайн хүзүү, элэгний хатуурал, хорт хавдар, чихрийн шижин, цусны даралт ихсэх зэрэг өвчнийг эрт илрүүлэх үйл ажиллагааг зохион байгуулсан. Тайлант хугацаанд 30 хувьд хүргэхээр төлөвлөсөн ч 31.4 хувь болж зорилтот төвшингээс давж, улсын хэмжээнд энэхүү ажлаараа эхний байранд явж байна. 
• БОЭТ-ийн мэдрэл, дотор, эрчимт эмчилгээний тасагт хийгдэх бүлэн хайлуулах эмчилгээг нутагшуулж, 1 эмч, 1 сувилагчийг бэлтгэв.  Улсын төсвийн хөрөнгө оруулалтаар ангиографийн аппаратаар хангагдан 210 хүнд оношилгоог хийснээр зүрхний цочмог шигдээс өвчний нас баралтыг 0.9 промиллоор буурсан дүн гарав. 
• Орон нутгийн хөрөнгө оруулалтаар БОЭТ-ийн Амбулаторийн нэг, хоёрдугаар давхрын их засварын ажил, Сүрьеэгийн диспансерын механик агааржуулалт, салхивч хийх, цогцос хадгалах байранд өргөтгөл хийв. Мөн тус төвийн цахилгаан кабель шугамыг шинэчлэхэд 135  сая төгрөг, гадна инженерийн шугам сүлжээний засварт 150 сая төгрөгийн хөрөнгө оруулалтын ажлуудыг хийжээ. 
• БОЭТ-ийг шаардлагатай багаж, тоног төхөөрөмжөөр хангахад 2022 онд 241,5 сая төгрөгийн санхүүжилт шийдвэрлэснээр тоног төхөөрөмжийн хангалт 92  хувь болж өмнөх онтой харьцуулахад 2 хувиар нэмэгдэв. 

Мэдээллийн төв