Аймгийн Засаг даргын нэрэмжит “Robot Challenge Erdenet 2022” тэмцээн боллоо

        Аймгийн Засаг даргын нэрэмжит “Robot Challenge Erdenet 2022” тэмцээн өнгөрсөн амралтын өдрүүдэд Орхон аймгийн ерөнхий боловсролын Орхон Эмпати сургуульд зохион байгуулагдаж өндөрлөлөө. 
         Тэмцээн Радио удирдлагатай сумо робот, Автомат удирдлагатай сумо робот, Лего сумо робот, Мини сумо робот, Зураас дагагч робот, Лего зураас дагадаг робот гэсэн 7 төрлөөр явагдсан юм.  Улаанбаатар хот болон бусад орон нутгийн 100 гаруй багийн нийт 250 оюутан, сурагч, технологийн багш нар оролцлоо. 
           Робот хөгжүүлэлт, хиймэл оюун-AI технологи сонирхогч хүүхэд залуусын шинжлэх ухаанч, бүтээлч, техникийн сэтгэлгээг хөгжүүлэх,  зорилгоор зохион байгуулагдсан уг тэмцээний төрөл тус бүр олон улсын шүүлтийн дагуу явагдсан юм. 
Орхон аймгийн ерөнхий боловсролын 20 сургуулийн 10 нь энэ төрлийн дугуйлан хичээллүүлэх нөхцөл боломжоор хангагдсан бөгөөд уг тэмцээнд 3-р сургуулийн баг “лего зураас дагадаг”төрөлд алтан медаль хүртлээ. 
            Шагнал гардуулах хаалтын үйл ажиллагаанд аймгийн Засаг даргын орлогч А.Түвшинжаргал оролцож баяр хүргэж үг хэллээ. Тэрээр “Орхон аймаг Эрдэнэт хот бол инженерүүдийн хот, энэ төрлийн уралдаан тэмцээнийг орон нутагтаа зохион байгуулж хүүхэд багачуудынхаа авьяас чадвар, бүтээлч сэтгэлгээг хөгжүүлэх нь ирээдүйн инженерүүдийг бэлтгэж байгаа ажил” гэв. 

Мэдээллийн төв