Монгол гэрт зориулсан дулаалга, халаалт, агаар сэлгэлтийн ЧИП багц төсөл Орхон аймагт нэвтэрч байна

“Нүүрсгүй шийдэл-Монгол гэрт” зориулсан дулаалга, халаалт, агаар сэлгэлтийн ЧИП багц төсөл Орхон аймагт  нэвтэрч байна.   НҮБ-ийн Хүүхдийн Сан (НҮБХС)-ийн “Агаарын бохирдлоос эх хүүхдийн эрүүл мэндийг хамгаалах” хөтөлбөрийн хүрээнд уг төслийг манай аймагт  БОАЖЯ, ЗДТГ, Пипл Ин Нийд (ПИН) ОУТББ,ШУТИС-ын Барилга архитектурын сургууль, Тогтвортой Санхүүжилтийн Холбоо хамтран хэрэгжүүлж байгаа юм.   Гадна болон дотор агаар арчны бохирдлыг бууруулах Монгол гэрт зориулсан “Дулаалга, халаалт, агаар сэлгэлтийн ЧИП” багц төсөл 2019 оноос хойш Монгол Улсад нэвтэрч, өдгөө нийслэл, Баянхонгор, Говь-Алтай, Өмнөговь  зэрэг аймгийн 1000 гаруй өрх хэрэглэгч нь болжээ. 

Энэ сарын 23,24,25-нд НҮБ-ын Хүүхдийн сангийн суурин төлөөлөгч Эваристе Коуасси Комлан тэргүүтэй төслийн багийнхан Орхон аймагт ажиллаж  ЧИП багцын талаар иргэд олон нийтэд мэдээлэл өгөх юм.  Мөн энэ үеэр гэрт амьдардаг зорилтот 50 өрхөд ЧИП багц олгоно. 

Гэр дулаалга, халаалт, сэлгэлтийн ЧИП багц нь  нүүрсээр галладаг уламжлалт зуухыг халж, эрчим хүчний хэмнэлттэй цахилгаан халаагуур, агаар сэлгэлтийн систем болон ус, салхины хамгаалалттай нэмэлт бүрээсээр гэрийг дулаалдаг дулаалгын багц юм. Эдгээр нь уламжлалт гэрийн эрчим хүчний хэмнэлт, дотоод агаарын чанарыг сайжруулахын зэрэгцээ гадна агаарын бохирдлыг бууруулж, аятай тухтай, амьдрах орчин нөхцлөөр хангаж үр дүнд хүрч байгаа ажээ. 

Их залуу багийн байранд иргэд олон нийтэд мэдээлэл өгөх “Гэр мэдээллийн төв”-ийг энэ сарын 24-нөөс ажиллуулахаар бэлтгэл ажлыг хангаж байна. 

Уг багцыг ашигласнаар:
•    Гал түлэх, мод хөрөөдөх, түлээ бэлтгэх цагийг илүү хэрэгцээтэй зүйлд зарцуулна
•    Дотоод орчны агаар буюу гэр доторх агаарын чанар сайжирдаг
•    ЧИП багцыг хэрэглэх үеийн цахилгааны зардал нь нүүрс түлэх ба түүнтэй холбогдох зардлаас зарим тохиолдолд бага, зарим тохиолдол адилхан байдаг
•    Дулаан алдагдал 40% буурдаг
•    Уламжлалт Монгол гэртэй харьцуулахад огцом халж хөрөхгүй, гэрийн дулаан хэвийн температурт байдаг байна.

Та бүхэн төсөл болон багцын дэлгэрэнгүй мэдээллийг АГААРНЭГ Фэйсбүүк хуудсаар эсвэл 77152828 лавлах утсаар холбогдон аваарай.