Газар тариалангийн нийт бүтээгдэхүүний нийлүүлэлт 20 хувиар өсжээ

Даваа гаригийн Засан даргын шуурхай зөвлөгөөнөөр аймгийн Хүнс, хөдөө аж ахуйн газрын дарга Ж.Бат-Өлзий газар тариалангийн асуудлаар  цаг үеийн мэдээлэл хийсэн. 
Тэрээр, Орхон аймаг хаврын тариалалтаараа дотоодынхоо хэрэгцээг 100 хувь хангах зорилт тавьсан. Тариалалтын бэлтгэл ажлын хүрээнд тариалан эрхлэгчдэдээ улсын төсвийн хөрөнгө оруулалт, зээл,  төсөл хөтөлбөрөөр санхүүгийн дэмжлэг үзүүлсэн. Тухайлбал, улсын төсвийн хөрөнгө оруулалтаар  637 сая, орон нутгийн төсвөөс 453 сая төгрөгийг үр тариа, хүлэмж  худалдан авахад дэмжлэг үзүүлсэн байна. 
      Засгийн газраас гурван хувийн хүүтэй хоёр жилийн хугацаатай  зээлийг Хаан, Төрийн банк, Хас зэрэг арилжааны банкуудаар дамжуулан олгосон. Манай аймгаас  9 ААНБ  3,1 тэрбум, 52 иргэн 1.2 тэрбум төгрөгийн зээл авч тариалан эрхлэлтэдээ зарцуулсан” гэх мэдээллийг өгөв. 
2022 оны хаврын тариалалтаар аймгийн хэмжээнд 13 АНН, 595 өрх газар тариалангийн үйлдвэрлэл эрхэлж 26 тэрбум төгрөгийн газар тариалангийн бүтээгдэхүүн үйлдвэрлэжээ..  Тариалалтаар нь авч үзвэл 13 хувиар, ургац 30 хувиар, газар тариалангийн нийт бүтээгдэхүүн нийлүүлэлт 20 хувиар тус тус өссөн үзүүлэлттэй байна. 

      Дотоодын тариалалтаар гурилынхаа хэрэгцээг 100 хувь, төмсний хэрэгцээг 86 хувь, хүнсний ногоог 72 хувиар хангах ажээ. Харин  хүлэмжийн тариалалт 3,4 га талбайд хүрч 278 тонн ургац хураан авсан нь хүнсний ногооны нийт ургацат хүлэмжийн ургац нь 4.7 хувийг эзэлж өмнөх оноос 0,4 хувиар өссөн үзүүлэлттэй байгаа нь 67 иргэн, аж ахуйн нэгжид хүлэмж олгон  дэмжин ажилласны үр дүн юм.