БОЭТ-ийн нарийн мэргэжлийн эмч нарын хүний нөөц 90 хувиар хангагдлаа

БОЭТ  мэдээгүйжүүлэг, дотор, уламжлалт анагаах ухаан, арьс харшил, халдварт, мэс засал, гэмтэл, чих хамар хоолой, түргэн тусламжийн  гэх мэт 12 эмчээр хүний нөөцөө нэмэгдүүллээ.  Мөн өнгөрсөн есдүгээр сард сул орон тоон дээр шинээр 13 эмч аван ажиллуулж байгаа билээ. Ингэснээр аймгийн хэмжээнд нарийн мэргэжлийн эмч нарын хүний нөөц 90 хувиар хангагдав. 

 Жил бүр үндсэн мэргэшил эзэмших эмч нарийнхаа тоог Эрүүл мэндийн хөгжлийн төвд хүргүүлдэг.  Тус төвөөс манай аймагт өгсөн квотын хүрээнд үндсэн мэргэшлээр суралцах эмч нар шалгалт өгдөг байна.  Ингээд тэнцсэн нь 1-3 жилийн хугацаанд үндсэн мэргэшлээр суралцаж ийн аймаг орон нутагтаа ирж ажиллаж байна.  Энэ жил түргэн тусламж, яаралтай тусламжийн тасгаас 6 ерөнхий эмчээ нэн шаардлагатай байгаа эмгэг судлал, чих хамар хоолой, эх барих эмэгтэйчүүдийн эмчээр сургаж эхэлжээ.  Мөн 5 сувилагч мэс засал, гэмтлийн нарийн мэргэжлийн сувилагч болгохоор сургалтад хамрагдаж байгаа аж. 

     Үндсэн мэргэшлийн эмч нар дахин төрөлжсөн мэргэшлийн эмч болох сургалтад нэг жил гаруйн хугацаанд хамрагддаг. Энэ хүрээнд дотрын эмч зүрх судасны эмч болохоор, мэс заслын эмч бүдүүн шулуун гэдэсний мэс заслын эмч болохоор мэргэшил дээшлүүлэн суралцаж байна.  Эмч, сувилагч нараа мэргэшүүлэх сургалтад  хамруулснаар эмнэлгийн тусламж үйлчилгээний чанар хүртээмж сайжрах, ачаалал буурах гээд олон талын давуу талтай.