Б.Баасансүрэн: “Эрдэнэт санд” түлээний модны мөнгөө төвлөрүүлсэн зорилтот бүлгийн иргэдийн түлшийг энэ долоо хоногоос олгоно

Даваа гаригийн Засаг даргын шуурхай зөвлөгөөнөөр Баян-Өндөр сумын Засаг дарга Б.Баасансүрэн цаг үеийн асуудлаар мэдээлэл хийлээ. Тэрээр,  өнөөдрийн  байдлаар 450 портер модны нөөцтэй, нэг портер мод 420-450 мянган төгрөгийн үнээр худалдаалагдаж байна. Мөн 450 тонн нүүрстэй. Нэг шуудай нүүрс 6500-7500 төгрөгийн үнэтэй байна. 
Ес болон аравдугаар сард түлээний мод авахаар “Эрдэнэт санд” мөнгөө тушаасан өндөр настан, хөгжлийн бэрхшээлтэй иргэн, өрх толгойлсон эцэг, эх гэх мэт зорилтот бүлгийн иргэдэд энэ долоо хоногт мод олгох ажлыг хийнэ” гэлээ. 
    Энэ жил орон нутгийн төсвийн  800 сая төгрөгийн санхүүжилтээр  Баян-Өндөр сумын ЗДТГ аймгийн хэмжээнд түлээ, түлшний зохиомол үнийн өсөлт, хомстол  үүсгэхгүй  байх үүднээс “Түлээ, түлш нийлүүлэх” төслийг хэрэгжүүлж  байгаа. Ингэхдээ Баян-Өндөр сумын ЗДТГ-аас ойн нөхөрлөлүүд дунд тусөл хэрэгжүүлэх сонгон шалгаруулалтыг зарлан гүйцэтгэгчийг сонгосон.  Төслийн хүрээнд      бэрхшээлтэй иргэн  гэх мэт  зорилтот  2600 гаруй өрхөд 350 мянган төгрөгөөр түлээний мод олгох юм.
 Мөн   түлээ, түлш нийлүүлэх  энэхүү төсөл хэрэгжсэнээр түлээний модны үнийг тогтворжуулах, ирэх оны модны нөөцийг бий болгох, ажилгүй иргэдийг ажлын байраар хангах, ирэх оны түлээний модны санхүүжилтийг “Эрдэнэт санд” төвлөрүүлэх гээд олон талын ач холбогдолтой гэж үзэж байна. 

Аймгийн БОАЖ-ын газартай хамтран Орхон аймагт үйл ажиллагаа явуулж байгаа Бугат, Баян-Өндөр, Буянтхангай, Ингэт зэрэг захуудад борлуулж буй түлээний модны  нөөцтэй танилцаж, MNS5412 2011 стандартын чанарын  нийцлийг шалгаж, мэдээлэл арга зүйн зөвлөгөө  өгч ажиллажээ. Шалгалтаар дээрх түлээний захуудад стандартад нийцсэн 318 метр куб түлээний модны нөөцтэй байна гэж мэдээлэв