“Эрүүл хүүхэд” төслийн хүрээнд IV сургууль “Эрүүл мэндийн жишиг кабинет”-тай боллоо

Өсвөр насны хүүхдүүдийн бие болоод сэтгэл зүйн эрүүл мэндийн боловсролыг нэмэгдүүлэх зорилгоор аймгийн Засаг даргын Тамгын газар БШУГ хамтран “Эрүүл хүүхэд” төслийг хэрэгжүүлж эхэлсэн.  Хувийн эрүүл ахуй ба орчны эрүүл мэнд, Хооллолт ба сэтгэцийн эрүүл мэнд, Хорт зуршил, нөхөн үржихүйн эрүүл мэнд, аюулгүй байдал анхны тусламж зэрэг эрүүл мэндийн цогц мэдэгдэхүүнийг ЕБС-ийн сурагчдад энэхүү төслөөр олгох юм. 

      Төслийн хүрээнд  хийгдэх нэг томоохон ажил нь ерөнхий боловсролын аль нэг сургуульд “Эрүүл мэндийн боловсролыг цогцоор нь олгох жишиг кабинет”-ийг байгуулах байв. Ингэхдээ ерөнхий боловсролын сургуулиуд дунд  төслийн уралдаан зарлаж,  4 дүгээр сургууль шалгарсан. 

Өнөөдөр  “Эрүүл мэндийн боловсролыг цогцоор нь олгох жишиг кабинет”-ийн нээлтийн арга хэмжээ болж, Засаг дарга С.Батжаргал болон, БСШУ-ны газрын дарга О.Ариунгэрэлт, 4 дүгээр сургуулийн удирдлага, багш ажилчид “Сурагч сэтгүүлчид” бүлгэмийн сурагчид оролцов.

Мөн энэ үеэр сурагчдын төлөөлөл яаралтай үед анхан шатны тусламж үзүүлэх дадлага сургуулилтийг хийж сонирхуулав. 

Орхон аймгийн хэмжээнд Эрүүл мэндийн боловсрол олгох чиглэлээр төрийн болон хувийн өмчийн 24 сургуульд 25 багш 19573 сурагчдад эрүүл мэндийн боловсрол олгодог.
Аймгийн хэмжээнд үйл ажиллагаа явуулж буй ерөнхий боловсролын сургуулиудад эрүүл мэндийн боловсрол олгох сургалт явуулах зориулалтын кабинет, лаборатори байхгүй, зарим шаардлагатай сургалтын хэрэглэгдэхүүн сурагчдад хүртээмжтэй бус зэргээс болж  сурагчдад эрүүл мэндийн боловсролыг үр дүнтэй олгох, эрүүл амьдралын хэв маяг, зөв хандлагад суралцуулахад бэрхшээлтэй зэрэг шалтгааны улмаас "Эрүүл хүүхэд" төслийг хэрэгжүүлэх болсон. 

Статистик  үзүүлэлтээс дурьдвал, 2021 оны байдлаар сурагчдын дунд хоол боловсруулах тогтолцооны, амьсгалын тогтолцооны өвчин өвчин өвчлөлийн тэргүүлэх шалтгаан болж байгаа бөгөөд “ЕБС-ийн сурагчдын эрүүл мэндийн зан үйлийг тодорхойлох” судалгаагаар сурагчдын 12.1 хувь нь илүүдэл жин, таргалалттай, 44.7 хувь нь өглөөний цай тогтмол ууж хэвшээгүй, 33.6 хувь нь өдөр бүр хийжүүлсэн ундаа уудаг, 26.4 хувь нь түргэн хоол, цайны газраар тогтмол үйлчлүүлдэг, 56,5 хувь нь сургууль дээр хоол идэх, цай уухдаа гараа угаадаггүй эсвэл хааяа угаадаг гэсэн судалгааны дүн гарчээ.
Тиймээс  өсвөр насныхан, хүүхэд багачуудад ээлтэй эрүүл мэндийн цогц боловсролыг олгохын тулд  энэхүү кабинетийг байгуулсан талаар Засаг дарга С.Батжаргал онцлон хэлсэн. 

Сурагчид Эрүүл мэндийн жишиг кабинетдаа  өөрсдийн иддэг хоол хүнсний шим тэжээлийг судлахаас эхлээд эмч,  багш нарын хамтаар эрүүл аж төрөх, эрүүл мэндээ хамгаалах цогц чадамжид суралцах орчин бүрдэж байгаа юм.