Аймгийн музейд “Бурхан шашны танин мэдэхүй” үзэсгэлэн нээгдлээ

ЗДТГ-аас хоёр дахь жилдээ өрнүүлж буй “Соёлыг түгээе” аян, Соёлын яамнаас өнөөдрөөс эхлүүлж буй “Соёлын бүтээлч сар”-аяны хүрээнд аймгийн Музей, Бурхан шашинтны төв хутагт ламын Ганданшаддүвлин хийд хамтран “Бурхан шашны танин мэдэхүй” үзэсгэлэнг өнөөдөр үзэгч олноо дэлгэлээ.   Үзэсгэлэнд 18, 19 дүгээр зууны үеийн шуумал болон зурмал 100 орчим бурхан шашны бүтээлийг дэлгэжээ. Соёлын яамнаас “Соёлын бүтээлч сар” аяныг хоёр дахь жилдээ  зохион  байгуулж байгаа бөгөөд нийслэл хотод 140 гаруй, орон нутагт 600 гаруй хөтөлбөр арга хэмжээг зохион байгуулахаар төлөвлөсөн байна. 

Аймгийн музейд долоо хоног гарах уг үзэсгэлэнд 18-20 дугаар зууны үед хэрэглэгдэж, хожим сэргээн залсан Манал, Гонгорсахиус гэх мэт зурмал бурхадыг дэлгэн тавьжээ. 
Энэхүү үзэсгэлэнгийн зорилго нь бурханы шашныг танин мэдэх, аль цаг үед ямар бурхан сахиусыг тахиж, шүтэж ирсэн гэхчлэн түүх өв, соёлыг танин мэдүүлэх юм. 

    Соёлын яамнаас зохион байгуулж буй “Соёлын бүтээлч сар” аяны хүрээнд долоо хоног бүр  өөр үйл ажиллагаа   зохион байгуулах аж.  Тухайлбал, эхний долоо хоног буюу энэ долоо хоногт “Үндэсний нэгдмэл үнэт зүйл” арга хэмжээний хүрээнд төрийн байгууллагууд дээр “Өглөөний эгшиг” төрийн байгууллагуудад нөлөөллийн үйл ажиллагаа, “Ганжуур данжуур” судрыг олон нийтэд сурталчлах, “Монгол цам”-ын тухай ЕБС-ийн дунд, ахлах  ангийн сурагчдад таниулах зэрэг олон талт арга хэмжээг зохион байгуулахаар төлөвлөжээ. 

Мэдээллийн төв