Урлагийн төрөлжсөн сургалттай “уран эгшиг” сургууль нээлтээ хийлээ

        Аймгийн Засаг дарга С.Батжаргалын санаачилгаар Орхон аймагт Урлагийн төрөлжсөн сургалттай “Уран эгшиг” ЕБС-ийг анхлан 2021 онд байгуулсан. 
Үндэсний өв соёл, оюун санааны үнэт зүйлсийг эрхэмлэн, сонгодог болон уламжлалт урлагийг дээдлэн суралцагч, гоо сайхны мэдрэмжтэй, бүтээлч сэтгэлгээтэй, өөртөө итгэлтэй, боловсролтой, ёс зүйтэй Монгол иргэнийг бэлтгэх зорилготой уг сургууль өнөөдөр нээлтээ хийж байна. 
     Нээлтийн арга хэмжээнд УИХ-ын гишүүн Д.Батлут, ЗГХЭГ-ын ОНЗУХ-ийн дарга П.Зоригтбаатар, аймгийн ИТХ-ын дарга Д.Мөнхбат, аймгийн Засаг дарга бөгөөд Эрдэнэт хотын захирагч С.Батжаргал болон бусад албаны хүмүүс оролцлоо.  “Уран эгшиг” сургууль нь өнөөдрийн байдлаар 1-11-р ангийн 335 сурагчтай, 52 багш ажилтантай үйл ажиллагаагаа явуулж байна.            Сургууль нийтдээ 350-400 сурагчтай байхаар төлөвлөгдсөн. 

     Сурагчдын нас бие, сэтгэхүйн онцлог, хэрэгцээ сонирхол, авьяас чадварт үндэслэн хөгжим, дуу, бүжиг, жүжиг, уран зураг, дизайн, гар урлал зэрэг урлагийн 13 төрөлжсөн ангиуд хичээллэж байна. “Уран эгшиг” сургууль нь ерөнхий боловсролын бусад сургуулийн нэгэн адил улсаас санхүүжиж, Зэрэгцсэн хөтөлбөрөөр хичээллэнэ. Урлагийн сургууль нь орон нутгийн нөөц боломжид тулгуурлан  1-р сургуулийн харьяа 12-р бага сургуулийн байранд үйл ажиллагаа явуулж байна.

    Урлагийн сургууль болгон тохижуулах эхний ээлжийн санхүүжилт болох 100 сая төгрөгийг орон нутгаас шийдвэрлэсэн. Цаашид орон нутгийн зүгээс хөгжүүлэхэд шаардлагатай хөрөнгө оруулалтыг үе шаттайгаар хийж бүс нутгийн хэмжээнд урлагийн үйлчилгээ үзүүлэх жишиг сургууль болгон өргөжүүлэх бодлогоор ажиллана гэдгээ аймгийн Засаг дарга С.Батжаргал онцоллоо.