СЭДЭВ:Тоглоомын аргаар тоо бодож, үсэг, өгүүлбэр бүтээн суралцаж буй “ТОГЛОНГОО СУРАЛЦЪЯ” дугуйлангаас бэлтгэв

 

"ТОГЛОНГОО СУРАЛЦЪЯ" ТӨСӨЛ ОРХОН АЙМГИЙН ТӨРИЙН ӨМЧИЙН  СУРГУУЛИУДАД  100 ХУВЬ  ХЭРЭГЖИЖ БАЙНА

Боловсролын Ерөнхий газраас нийслэл, 21 аймгаас тус бүр 4 сургууль сонгон нийт 142 сургууль дээр "Тоглонгоо суралцъя” төслийг энэ хичээлийн жилийн нэгдүгээр улиралд туршин хэрэгжүүлж эхэлсэн. Орхон аймгаас ерөнхий боловсролын II, VII, XIII, XV сургууль сонгогдож, үүнд шаардлагатай 12 сая төгрөгийн санхүүжилтийг Боловсролын ерөнхий газраас шийдвэрлэсэн.

    Аймгийн удирдлагууд уг төслийг бүх сургууль дээр  хэрэгжих нь зүйтэй гэж үзэн орон нутгийн төсвөөс 48 сая төгрөгийн санхүүжилтийг шийдэж, төрийн өмчийн 13 сургууль дээр "Тоглонгоо суралцъя” төслийг хэрэгжүүлж эхлээд байгаа нь энэ юм.  

Ингэснээр Орхон аймгийн төрийн өмчийн 17 ерөнхий боловсролын  сургууль дээр “Тоглонгоо суралцъя” төсөл хэрэгжиж,   хүүхдүүд тоглодог тоглоом, гарын доорх материал ашиглаж  тоо бодож, үсэг, өгүүлбэр бүтээн уншиж мэдлэг, чадвараа дээшлүүлж байна.

Төсөл хэрэгжиж байгаа 17 ерөнхий боловсролын сургуулийн 3-5 дугаар ангийн 19 мянга гаруй сурагчдад төвшин тогтоох гарааны үнэлгээг хийжээ.

Өнөөдрийн байдлаар  аймгийн хэмжээнд 3-5 дугаар ангийн 2500 орчим хүүхэд бүлгийн хичээлээс гадна нэмэлтээр монгол хэл, математикийн хичээлээр “Тоглонгоо суралцъя” дугуйланд хамрагдаж тоглонгоо суралцаж байна. 

ШИРЭЭНИЙ АРД НОМХОН СУУХААС ИЛҮҮТЭЙ ТОЙРЧ СУУН ХӨГЖИЛТЭЙГӨӨР ХИЧЭЭЛЛЭХ НЬ ТЭДЭНД ИЛҮҮ СОНИРХОЛТОЙ 

Тооны хичээлд шагай, монгол хэлний хичээл дээр Монгол орны газрыг зураг эвлүүлэх, хөзөр ашиглаж үг, өгүүлбэр бүтээн хөгжилтэйгөөр өрнөх  сургалтын нэг цагийн хугацаа яах ийхийн зуурт өнгөрөв.  Хичээл дуусахтай зэрэгцэн   сурагчид маргааш “ямар тоглоом ашиглах вэ, багш аа” гэж ам уралдан асууна.

Энэ бол  орон нутгийн санхүүжилтээр “ТОГЛОНГОО СУРАЛЦЪЯ”  төсөл хэрэгжиж буй ерөнхий боловсролын V сургуулийн монгол хэлний дугуйлангийн нэг цагийн хичээлийн нэгээхэн хэсэг нь. Тус сургуулийн 5 дугаар ангийн зургаан бүлгээс тус бүр таван сурагч нийт 25 сурагч  шинээр дахин нэг анги хамт олон болсон нь монгол хэлний “ТОГЛОНГОО СУРАЛЦЪЯ” дугуйлан юм.  Ширээний ард номхон суухаас илүүтэй тойрч суун хөгжилтэйгөөр хичээллэх нь тэдэнд илүү  сонирхолтой байгаа нь илт. Цар тахалтай үеийн сурагчдын хоцрогдлыг арилгах нь  төслийн нэг  зорилго.  

Төсөл хэрэгжээд дуусахад дугуйланд хамрагдсан хүүхдүүд  багаар ажиллах,  хамтын ажиллагаа, бүтээлч байдал, сэтгэн бодох, хэл яриа  гэх мэт олон чадварыг эзэмшиж үеийнхнээ манлайлах нь дамжиггүй гэх бодол төрснийг нуух юун.

 

 

Хичээлээс хичээлийн хооронд хүүхдүүдийн идэвх оролцоо сайжирч байгаа тухай ярьсан “ТОГЛОНГОО СУРАЛЦЪЯ” дугуйлангийн багш Д.Оюундэлгэрийн яриа үүнийг бататгана. Мөн  “нотолгоонд суурилсан сайн туршлага хуваалцаж, хамтран хөгжих”  гэсэн зорилтыг хэрэгжүүлэхэд энэхүү төсөл чухал алхам болно гэж үзсэн учир энэ хичээлийн жилийн нэгдүгээр улиралд туршилтын журмаар хэрэгжүүлээд байгаа нь энэ юм.

Ерөнхий боловсролын V дугаар сургуулийн 125 хүүхэд уг төсөлд хамрагдаж байна. Унших чадварыг нэмэгдүүлэх 3-5 дугаар ангийн 75 сурагч, өгүүлбэртэй бодлого бодох чадварыг сайжруулахад 4-5 дугаар ангийн 50 хүүхэд бий.

Мэдээллийн төв