Сэдэв:“Эмнэлэг хөдөлмөрийн магадлах комисс”-ын буюу группын хурлын тухай...

Эрүүл мэндийг дэмжих төвийн нэг давхар жирийн өдрүүдээс илүүтэй хөл хөдөлгөөн ихтэй  өдөр нь пүрэв гариг.   Та бидний  нэрлэж заншсанаар группын хурал, эмнэлгийн нэршлээрээ “Эмнэлэг хөдөлмөрийн магадлах комисс”-ын хурал  пүрэв гариг бүрийн 14:00 цагаас хуралдаж  байгаа нь энэ юм.  Үүнтэй зэрэгцээд “Эмнэлэг хяналтын комисс”-ийн хурал бас эхэлнэ. 

     Өмнө нь тогтоолгосон группээ сунгуулах, шинээр тогтоолгох гэж ирсэн  иргэд эхлээд “Эмнэлэг хяналтын комисс”-ын хурлаар орно. Тэндээс гарсан санал дүгнэлтээ аван эсрэг талын өрөөнд болж буй “Эмнэлэг хөдөлмөрийн магадлах комисс”-ын хурлаар орсноор тухайн иргэнтэй холбоотой эцсийн шийдвэр  гардаг. Группын хурал буюу “Эмнэлэг хөдөлмөрийн магадлах комисс”-ын хурлын явц ингэж үргэлжилнэ.  Эрүүл мэндийг дэмжих төв ашиглалтад орсноос хойш группын хурал энд болдог  болсон нь  өмнөх БОЭТ-ийн амбулаторийг бодвол хамаагүй  зай талбай томтой  болсон нь харагдана. 
Орхон аймагт хөдөлмөрийн чадвар алдалтын хувь тогтоолгосон 3456 иргэн бий. Осол гэмтэл, мэдрэлийн болон дотор өвчлөл, сэтгэцийн эмгэг дийлэнх хувийг эзэлж байна. 

Пүрэв гариг бүрийн 14:00 цагт группын хуралтай.

    Хоёр өдөр дамжин хуралддаг байсан  группын хурал нэг өдөр нэг цагт тогтмол хугацаанд хуралддаг болоод багагүй хугацаа өнгөрч байна. “Эмнэлэг хөдөлмөрийн магадлах комисс”-ыхон аймгийн ЗДТГ-тай хамтран хурлын заал, үйлчилгээний танхимын асуудлыг шийдсэн нь нэг хурлаас нөгөө хурлын хооронд явах иргэдийн явдлыг багасгажээ. Өнөөдөр хуралд орсон иргэн маргааш нь Нийгмийн даатгалын хэлтэст очдог байсныг ч болиулж, байцаагч өөрөө хуралд ирж суудаг болсноор мөн л иргэний явах явдлыг багасгав. 

“Эмнэлэг хөдөлмөрийн магадлах комисс”-ийн хурал болох өдөр цаг тодорхойгүй, өмнө нь зарладаг байхад тэр өдөр нь Өрхийн эрүүл мэндийн төвүүд хурлаар орох бүх хүмүүсээ авчирч дугаарладаг байв. Өглөө 9:00 цагт ирсэн хүн оройн 6,7 цаг хүртэл хүлээх жишээний. 
Өрхийн эрүүл мэндийн төвүүдэд “Цахим цаг авалт”  аппликейшнийг нэвтрүүлснээр ийн пүрэв гариг бүрийн 14:00 цагт хуралдах болсон. Ингэхдээ  эхний цагийн захиалга өгсөн Өрхийн эрүүл мэндийн төв  таван хүн хурлаар оруулна гэвэл нэг хүнд 10 минут зарцуулна гэж тооцон 50 минутын дараа өөр нэг өрхийн эмнэлэг хурлаар орох хүмүүсээ авчирна. 
Урт удаан хугацаагаар хүлээх хүлээлтийг ингэж шийдсэнээр нэг иргэн хамгийн ихдээ 30 минут хүлээдэг болжээ. 

   Долоо хоног бүр болох хурлын үеэр даатгалын байцаагч хуралд орох гэж байгаа болон хурлаар ороод гарсан  иргэдээс  тухайн хурлын үйл явц, комиссын гишүүдийн харилцаа хандлагын талаар сэтгэл ханамжийн судалгааг авч дүгнэдэг гэх мэт ажлыг санаачлан хийж байна.  Дээр хэлсэнчлэн “Эмнэлэг хяналтын комисс”-ын  гаргасан санал дээр үндэслэн “Эмнэлэг хөдөлмөр магадлалын комисс”  тухайн иргэний группыг сунгах, цуцлах, хөдөлмөрийн цагийг богиносгох, хөдөлмөрийн нөхцөлийг солих гэх мэт эцсийн  шийдвэрийг тухайн иргэний эмнэл зүйн шинжилгээ,  оношилгоо, бичиг баримт  дээр үндэслэн гаргана. 

    “Эмнэлэг хөдөлмөрийн магадлах комисс” нь 10 хүний бүрэлдэхүүнтэй. Комиссын даргаар аймгийн Нийгмийн даатгалын хэлтсийн дарга, орлогч даргаар нь БОЭТ-ийн Эмчилгээ эрхэлсэн орлогч дарга, нарийн бичгээр нь тухайн эмнэлгийн дүн бүртгэлийн эмч ажилладаг.  Мөн Нийгмийн даатгалын хэлтсээс магадлагч эмч, нарийн мэргэжлийн эмч нар, халамжийн байгууллага, үйлдвэрчний эвлэл, хөгжлийн бэрхшээлтэй иргэдийн төлөөлөл багтдаг.  Харин Эмнэлэг хяналтын комисст дотор, гэмтэл, нүд, чих, хамар хоолой гээд нарийн мэргэжлийн эмч нарийн 5 хүний бүрэлдэхүүнтэйгээр БОЭТ-ийн даргын тушаалаар батлан ажиллаж байна.