“Эрдэнэт Үйлдвэр” ТӨҮГ-ын Ерөнхий захирал Г.Ёндон ажлаа хүлээн авлаа

     “Эрдэнэт Үйлдвэр” ТӨҮГ-ын Ерөнхий захирлын ажил хүлээлцэх арга хэмжээ өнөөдөр Эрдэнэт Үйлдвэрийн “Оюу” танхимд боллоо. Үйл ажиллагаанд Монгол Улсын Засгийн газрын Хэрэг эрхлэх газрын дэд дарга, “Эрдэнэс Монгол” компанийн ТУЗ-ийн дарга Б.Энх-Амгалан, ТӨБЗГ-ын дарга Б.Цэнгэл, Орхон аймгийн Засаг дарга бөгөөд Эрдэнэт хотын захирагч С.Батжаргал болон уурхайчин хамт олны төлөөллүүд оролцоо. 
      Үйл ажиллагааны эхэнд ТӨБЗГ-ын дарга Б.Цэнгэл: Х.Бадамсүрэнг Монголын Зэс, металлын корпорацийн захирал болсонтой холбогдуулан үүрэгт ажлаас нь чөлөөлж, Уул уурхай хүнд үйлдвэрийн сайд асан Г.Ёндонг “Эрдэнэт Үйлдвэр” ТӨҮГ-ын Ерөнхий захирлаар томилж буй тухай шийдвэрийг уншиж танилцуулав. 
       Аймгийн Засаг дарга С.Батжаргал ажил хүлээлцэж буй захирлуудад хандан амжилт хүсч хэлсэн үгэндээ: Х. Бадамсүрэн захирал нь хүнд цаг үед аймаг орон нутагтай хамтран ажиллаж, оновчтой бодлого шийдвэрээр уурхайчдаа удирдан ажиллах 6 жилийн хугацаандаа олон ажлыг эхлүүлж, хотын хөгжлийн төлөө нийгэмд чиглэсэн бүтээн байгуулалтыг өрнүүлэхэд томоохон хөрөнгө оруулалт хийсээр ирсэн гэдгийг онцлов.

       Түүнчлэн “Эрдэнэт Үйлдвэр”ТӨҮГ, аймаг орон нутгийн хамтын ажиллагааны хүрээнд иргэддээ чиглэсэн олон ажлыг цааш үргэлжлүүлэн хэрэгжүүлж амжилттай ажиллана гэдэгт итгэлтэй байгаагаа Г.Ёндон захиралд хандан хэлээд ажилд нь амжилт хүслээ. 

      Х.Бадамсүрэнг Ерөнхий захирлаар ажиллах 6 жилд аймаг орон нутаг болон Эрдэнэт Үйлдвэр ТӨҮГ-ын хамтын ажиллагааг албан ёсны гэрээтэй болгож, нэг жилд 2 тэрбумаас багагүй хөрөнгө оруулалтыг гэрээний хүрээнд орон нутагт шийдвэрлэсээр ирсэн. Үүнд “Эрдэнэт цэцэрлэгт” хүрээлэн, одоо хэрэгжиж буй Орлогод нийцсэн орон сууц төсөл зэрэг томоохон хөрөнгө оруулалт хийснийг дурдаж болно. 
     Түүнчлэн Уурхайчдын нийгмийн асуудалд анхаарч Уурхайчин 1, 2, 3-р хорооллыг байгуулах ажлыг эхлүүлж, олон жил дэд бүтэц шийдэгдээгүй байсан 1А хорооллын дэд бүтцийн асуудлыг хэлэлцсэнээр барилгын ажил эхэлсэн юм.