2023 оны хөгжлийн жилийн төлөвлөгөөний төслийг хэлэлцлээ

    Аймгийн Засаг дарга С.Батжаргал ирэх жил төрийн албан хаагчийн хөгжлийн хөтөлбөр боловсруулж ИТХ-аар батлуулан ажиллах саналыг Засаг даргын зөвлөлийн гишүүдэд санал орууллаа. 
       Аймгийн Засаг даргын зөвлөлийн хурал хуралдаж аймгийн 2021 оны төсвийн гүйцэтгэл  батлах тухай, газрын үнэлгээний бус итгэлцүүрийн тоон утга, төлбөрийн хэмжээг тогтоох, орон нутгийн өмчит хувьцаат компани байгуулах тухай, аймгийг хөгжүүлэх 2023 оны жилийн ажлын төлөвлөгөөг батлах тухай тус тус хэлэлцсэн юм. 
         2023 оны хөгжлийн жилийн төлөвлөгөөнд 23 байгууллага, аймгийн ИТХ-ын төсөв санхүүгийн хөгжлийн хороо, УИХ-ын дэд хороо зэрэг нийт 25 газраас ирсэн саналыг нэгтгэн тусгажээ. 
Орхон аймгийг 2020-2025 онд хөгжүүлэх 5 жилийн үндсэн чиглэл, Засаг даргын үйл ажиллагааны хөтөлбөртэй уялдуулж, Монгол улсын жилийн ажлын төлөвлөгөөтэй нийцүүлэн боловсруулдаг уг төлөвлөгөөний төсөлд нийт 8 үйл ажиллагааны 31 зорилт 263 ажил тусгагдсан байна. 
       Улсын төсвийн хөрөнгө оруулалтаар он дамжин хийгдэх бүтээн байгуулалтын ажлууд үргэлжилж, эрүүл мэндийн салбарт тоног төхөөрөмжийн шинэчлэлтийг нэмэгдүүлж, боловсрол соёлын салбарт бүтээн байгуулалт, хөрөнгө оруулалтын ажлууд түлхүү хийгдэх зэрэг олон арга хэмжээ төлөвлөгөөний төсөлд тусгагджээ. 
        Иргэдийн нийгмийн асуудал болоод хотын хөгжилтэй уялдуулан хэрэгжүүлж буй 20 гаруй хөтөлбөр аймгийн хэмжээнд хэрэгжиж буй. Үүн дээр нэмж 2023 оноос “ТӨРИЙН АЛБАН ХААГЧИЙН ХӨГЖЛИЙН ХӨТӨЛБӨР” боловсруулагдахаар болж байна. 

Мэдээллийн төв