Гэр хорооллын багуудад хог ангилж хаях, ачиж тээвэрлэх үйлчилгээг эхлүүллээ

    Орхон аймаг хог ангилж хаях, ачиж тээвэрлэх үйлчилгээг  туршилтаар хэрэгжүүлж эхлэхээр энэ оны орон нутгийн төсөвт 1,4 тэрбум төгрөг тусгасан. Үүнд тус бүр 11 тонны багтаамжтай 44 бункер, хог ачих 4 машин нийлүүлэгдэхээс эхний ээлжийн 4 авто техник ирсэнийг өнөөдөр аймгийн удирдлагууд хот тохижуулах газарт хүлээлгэн өглөө. 
      Гэр хорооллын хог ачилтын менежментийг сайжруулах зорилгоор хийгдэж буй уг ажлыг эхний ээлжинд хүн ам багатай 5 багийг сонгон авч хэрэгжүүлнэ.   Хог ангилж хийх зориулалттай бункерийг тогтсон өдөрт 24 цагаар гудманд байршуулж, иргэд хогоо ангилан төвлөрүүлж дуусмагц хот тохижуулах газраас хогийг ачиж тээвэрлэх юм байна. 
Ингэснээрээ гэр хорооллын айл өрхийн хог ачилтын давтамж ойртох, ил задгай хог хаягдалгүй болох, хот тохижуулах газрын ажилчдын ажил хөнгөвчлөх зэрэг олон давуу тал үүсч байгаа юм. 
     Энэ жил хот тохижуулах газарт орон нутгийн төсвийн 2,0 тэрбум төгрөгөөр парк шинэчлэлтийн ажил хийгдэхээр төлөвлөгдсөн. Дээрх авто техник, хогийн бункерүүдээс гадна авто зам цэвэрлэгээний 3 авто техник тун удахгүй нийлүүлэгдэнэ.  
      Эдгээр ажлууд нь манай аймагт хэрэгжиж буй хог хаягдлын менежментийг сайжруулах  хөтөлбөрийн хүрээнд хийгдэж буй ажлууд юм. Тус хөтөлбөрт  хог хаягдлыг эдийн засгийн эргэлтэд оруулах, газрын хөрсөн дээрх хог хаягдлыг 30-50 хувь бууруулах, гэр хорооллын хог ачилтын менежментийг сайжруулах зэрэг зорилтууд тусгагдсан байгаа. 
     Дахин сануулахад хог хаягдлын менежментийг сайжруулах хүрээнд манай аймаг НҮБ-ын хөгжлийн хөтөлбөртэй хамтран ажиллаж хогоо анхан шатанд ангилан ялгах төслийг эхлүүлж дахивар хог хаягдлын тээвэр ложистикийн төвийг  байгуулсан. 
    БОАЖЯ, Агаар, орчны бохирдлыг бууруулах үндэсний хорооноос Хог хаягдлын нэгдсэн цэг орчмын газрын хөрсний доройтлыг зогсоох, хог хаягдлын тархалтыг хумих, дарж устгах, хамгаалалтын далан байгуулах, хөрсний нөхөн сэргээлтийг хийхэд зориулж нэг тэрбум төгрөгийн санхүүжилтийг шийдвэрлэсэн. Уг эх үүсвэрээр 35га талбайн хогийг хумих бөгөөд 3 га талбайд мод үржүүлэг, ойжуулалтын ажлыг хийж гүйцэтгэхээр төлөвлөсөн. 
     Мөн Монгол, Польш хоёр  улсын Засгийн газар хоорондын хэлэлцээрийн дагуу Орхон аймагт хатуу хог хаягдал боловсруулах үйлдвэр барих гэрээг 2019 онд үзэглэсэн. Тус гэрээний хүрээнд Хог боловсруулах үйлдвэрийн барилга угсралтын ажил хийгдэнэ. Мөн хог хаягдал ангилан ялгах төслийн хүрээнд нийлүүлэгдэх 12 машин механизмын 11 нь аймгийн гааль дээр ирээд байгаа юм.